काठमाडौं- त्रिभुवन अन्तर्राष्ट्रिय विमानस्थलमा वैदेशिक रोजगारीमा जाने श्रमिकका लागि व्यवस्था गरिएको छुट्टै लाइन हटाइएको छ ।
श्रम, रोजगार तथा सामाजिक सुरक्षा मन्त्रालयको आग्रहमा गृह मन्त्रालयको निर्देशनपछि विमानस्थलमा राखिने गरेको छुट्टै लाइन हटाइएको हो ।
त्रिभुवन अन्तर्राष्ट्रिय विमानस्थलबाट प्रस्थानका लागि अध्यागमन जाँचकाे समयमा वैदेशिक रोजगारीमा जानेहरूका लागि छुट्टै डेस्क रहँदै आएको थियो ।
चौतर्फी दबाबपछि उक्त डेस्क हटाइएको थियो । डेस्क हटाइए पनि अध्यागमन चेकका लागि श्रमिकहरूका लागि छुट्टै लाइनको व्यवस्था गरिएको थियो ।
श्रम, रोजगार तथा सामाजिक सुरक्षा मन्त्रालयका प्रवक्ता डण्डुराज घिमिरेले श्रमिकको लागि छुट्टै लाइनको व्यवस्था गरेर उनीहरूको आत्मसम्मानमा चोट पुग्ने काम भएको बताए ।
त्यही आधारमा त्यो लाइन हटाउन श्रम मन्त्रालयले गृह मन्त्रालयलाई पत्र लेखेको थियो । उक्त पत्रको जबाफमा गृह मन्त्रालयले विभेद नगरी सहज रूपमा श्रमिकलाई पठाउन निर्देशन दिएको थियो ।
सोही आधारमा अध्यागमन जाँचका लागि राखिएको छुट्टाछुट्टै लाइन हटाइएको उनको भनाइ छ ।
छुट्टै लाइनको व्यवस्था गरिएपछि श्रमिकहरूको आत्मसम्मानमा ठेस पुगेको टिप्पणी हुने गरेको थियो । विदेश यात्रामा जाने, अध्ययन बिदामा जाने, डिम्लोमेटिक भ्रमणमा जानेहरूलाई छुट्टै लाइनमा राखेर चेकअप गरिँदै आएको थियो ।
छुट्टै लाइनको व्यवस्था गरेर अध्यागमनका कर्मचारीहरूले अनेक प्रश्न सोधेर अनावश्यक दुःख दिने गरेको श्रमिकहरुको गुनासो थियो ।
