गुणस्तरहीन औषधि बिक्रीमा निगरानी बढाउन स्वास्थ्यमन्त्रीको निर्देशन

काठमाडौँ– स्वास्थ्य तथा जनसंख्या मन्त्री पदम गिरीले बजारमा छ्यापछ्याप्ती गुणस्तरहीन औषधि बिक्री भइरहेको गुनासो आइरहेको भन्दै सबै ठाउँमा निगरानी बढाउन निर्देशन दिएका छन् । 
मंगलबार औषधि व्यवस्थापन विभागको अनुगमन तथा ब्रिफिङ लिने क्रममा आयोजित कार्यक्रमलाई सम्बोधन गर्दै उनले विभागलाई यस्तो निर्देशन दिएका हुन् । 
उनले सीमित क्षेत्रको भन्दा पनि अब सबै ठाउँका फार्मेसीहरूको निरीक्षण र नियमन गर्न आवश्यक रहेको बताए । निगरानी र निरीक्षणको विषयमा आवश्यक जनशक्ति नभएको वा अन्य कुनै पनि बहाना नबनाई प्रतिबद्ध भएर निरीक्षणमा लाग्न मन्त्री गिरीले निर्देशन दिए । 
नागरिकको स्वास्थ्यमा कसैले पनि खेलबाड गर्न नमिल्ने बताउँदै आफूले दिएका निर्देशन प्रभावकारी कार्यान्वयन गर्न उनले निर्देशन दिए । विभाग ठोस योजनाका साथ अघि बढ्नुपर्ने बताएका उनले चाँडोभन्दा चाँडो कार्ययोजना बनाई मन्त्रालयमा आफ्ना मागहरू लिएर आउन आग्रह गरे । 
मन्त्री गिरीले नेपालमा नै अत्यावश्यक औषधि उत्पादन गर्नुपर्ने बताउँदै नवीकरणसम्बन्धी कामहरू अनलाइन प्रणालीबाट गराउन पनि निर्देशन दिए ।
मन्त्री गिरीले स्वास्थ्य विभागमा पूर्वाधारको दुरवस्था रहेको भन्दै पूर्वाधारको निर्माण गरेर अघि बढ्न निर्देशन दिए ।
उनले औषधि विभागको क्षमता वृद्धि गर्नुपर्ने बताउँदै स्वास्थ्यको क्षेत्रमा अब नेपालमा आधारभूत रूपले जनताले अनुभूत गर्ने गरी स्वास्थ्य क्षेत्रको सुधार गर्न आवश्यक रहेको जनाए ।