काठमाडौँ– माघे संक्रान्ति सकिए पनि घिउ चाकु सकिएको छैन । माघे संक्रान्तिमा खानैपर्ने घिउ चाकु विगतका वर्षहरूमा अपुग हुन्थ्यो । त्यही परिमाणको घिउ चाकु बनाए पनि यस वर्ष नसकिएपछि असन बजारको अन्नपूर्णपछाडि वर्षौंदेखि घिउ चाकुको व्यवसाय गर्दै आएका राजेन्द्र तुलाधर चिन्तित छन् ।
‘हरेक वर्ष अपुग हुन्थ्यो, अहिले माघीका लागि बनाएको घिउ चाकु सकिएन । माघीमै घिउ चाकु बिक्री नभएपछि अरू दिनमा हुन्छ भन्ने अपेक्षा पनि हुँदैन,’ तुलाधरले भने ।
चाडबाडका बेलामा खुट्टा राख्ने ठाउँ नहुने असन बजारमा यो वर्षको माघीमा आउजाउ नै कम भएको उनको अनुभव छ ।
वर्षौंदेखि एउटै ठाउँमा एउटै व्यवसाय गर्दै आएका तुलाधरसँग अरूबेला पनि असनमा बिहानैदेखि राति अबेरसम्म भीड लाग्ने गरेको अनुभव छ ।
‘अरू बेला पनि त्यति भीड हुँदैन, चाडबाडको बेला यहाँ खुट्टा राख्ने ठाउँ हुन्थेन, तर अहिले त्यस्तो भएन,’ उनले सुनाए ।
मंसिर लागेदेखि नै घिउ चाकुको उत्पादनमा लाग्ने उनीहरू माघ १ गतेकै दिन सबै बेचेर सकिन्थ्यो । २ महिना लामो कामपछि तयार हुने घिउ चाकु राम्रो व्यापार भए १ दिनमै सकिने गरेको असनका व्यापारीको भनाइ छ ।
‘कोरोनाको महामारीमा पनि घिउ चाकुको व्यवसाय राम्रो भएको थियो, तर अहिले यहाँ पार्किङ गर्न नदिने भएपछि व्यापार नभएको जस्तो मलाई लागेको छ । पार्किङ गर्ने ठाउँ नभएपछि यहाँ आएर किन्ने कुरा भएन । त्यसैले व्यापार पनि घट्यो,’ उनले भने ।
४० बर्ष पुरानो असनको अन्नपूर्ण मन्दिरपछाडि रहेको सानो र चिटिक्क परेको पसलमा राजेन्द्रले घिउ चाकु र तेलबाहेक अरू केही बेच्दैनन् । उनी १२ महिना नै घिउ चाकुका अलावा अग्र्यानिक तोरीको तेल बेच्छन् ।
‘उहाँ (बालेन शाह)लाई काठमाडौँको मेयरमा जिताएर केही नयाँ गर्नुहोला, हाम्रा दुःखका दिन कम होलान् भन्ने अपेक्षा थियो । तर उहाँले हाम्रै रोजीरोटी खोस्ने गरी झन् नयाँ गरिदिनुभयो,’ सोही ठाउँका अर्का एक व्यापारी गुनासो गर्दै थिए । 
मुख्य सडकमा पैसा उठाउने पार्किङ बनाएर भित्री सडकको पार्किङ उठाएको उनको गुनासो छ ।
‘कमिसन आउँछ होला, त्यसैले मुख्य सडकमा पार्किङ बनाएका छन् । भित्रको पार्किङ हटाएका कारण हाम्रो व्यापार नभएको उहाँहरूले कहिले बुझ्नुहुन्छ ?’
माघको १५ घर्किएको छ । विगतका वर्षहरूमा १ दिनमा हुने घिउ चाकुको व्यापार अहिले १५ दिनसम्म पनि नभएपछि व्यापारीहरूले चित्त दुखाएका हुन् ।
