काठमाडौँ– शेरबहादुर खड्का स्मृति प्रतिष्ठानको आयोजनामा राष्ट्रिय महिला भलिबल प्रतियोगिताको छैटौँ संस्करण हुने भएको छ ।
प्रतिष्ठानले बुधबार काठमाडौँमा पत्रकार सम्मेलन गर्दै महिला भलिबल खेलाडीको सशक्तीकरण र क्षमता अभिवृद्धि गर्ने उद्देश्य अनुरूप माघ २१ देखि २४ गतेसम्म दशरथ रंगशालामा राष्ट्रिय महिला भलिबल प्रतियोगिता आयोजना गर्न लागिएको जानकारी दिएको हो ।
प्रतियोगितामा सशस्त्र प्रहरी बलको एपिएफ क्लब, न्यु डायमन्ड युथ स्पोर्ट्स क्लब, नेपाल पुलिस क्लब, त्रिभुवन आर्मी क्लब, गण्डकी प्रदेश भलिबल संघ र एभरेस्ट भलिबल क्लब गरी ६ टोलीको सहभागिता रहने छ ।
नेपाल भलिबल संघको प्राविधिक सहयोगमा सञ्चालन हुने प्रतियोगिताका सहभागी टोलीलाई २ समूहमा विभाजन गरी लिगकम नकआउटका आधारमा खेल सञ्चालन गरिने आयोजकले जनाएको छ ।
प्रतियोगिताका विजेता टोलीलाई नगद ३ लाख रुपैयाँ पुरस्कार प्रदान गरिनेछ । यस्तै उपविजेताले १ लाख ५० हजार र तेस्रो हुने टोलीलाई ७५ हजार रुपैयाँ नगद पुरस्कार पाउने छन् ।
प्रतियोगिताका सर्वोत्कृष्ट खेलाडीलाई नगद ५० हजारसँगै अन्य आकर्षक पुरस्कार प्रदान गरिने आयोजकको भनाइ छ ।
पत्रकार सम्मेलनमा नेपाल भलिबल संघका अध्यक्ष जितेन्द्रबहादुर चन्दले राष्ट्रिय प्रतियोगिताले भलिबलको स्तर विकासका सहयोग पुग्ने बताए ।
उनले नेपालको भलिबल क्षेत्रको पूर्वाधारलाई बलियो बनाउन संघको ध्यान केन्द्रित रहेको धारणा राखे ।
पत्रकार सम्मेलनमा प्रतिष्ठानले मुख्य प्रायोजक बहुराष्ट्रिय पेन्ट कम्पनी केएनपी नेरोलेकसँग सम्झौता पनि गरेको छ ।
प्रतिष्ठानकी संरक्षक गमली खड्का र केएनपी नेरोलेकका कन्ट्री डाइरेक्टर मनोजकुमार मिश्रले सम्झौतापत्रमा हस्ताक्षर गरे ।
प्रतियोगिताको अनुमानित बजेट करिब ४० लाख रुपैयाँ रहेको जनाइएको छ ।
