पाइलटले प्रतिदिन ८ घण्टा उडान र ८ वटा मात्रै अवतरण गर्न पाउने

काठमाडौं– नेपाल नागरिक उडड्यन प्राधिकरणले हवाई उडान सुरक्षित बनाउन आगामी ग्रिस्मकालिन मौसम लागेसँगै नयाँ हवाई उडान व्यवस्था लागू गर्ने भएको छ । 

प्राधिकरणले आन्तरिक हवाई उडानलाई थप सुरक्षित, भरपर्दो, मर्यादित र व्यवसायिक बनाउने उद्देश्यले नयाँ व्यवस्था लागू गर्न लागेको बताएको हो । 

प्राधिकरणले उडड्यन क्षेत्रका विज्ञ तथा सरोकारवालाहरूसँग छलफल गरेर नयाँ हवाई उडान व्यवस्था तय गरेको छ ।

हवाई उडानलाई थप सुरक्षित र भरपर्दो बनाउनको लागि हवाई उडान सम्बन्धि नयाँ व्यवस्था लागू गर्न लागेको प्राधिकरणका सूचना अधिकारी ज्ञानेन्द्र भुलले बताए । 

अन्तर्राष्ट्रिय नागरिक उडड्यन प्राधिकरणको सिकागो सम्मेलनको मापदण्ड बमोजिम ३÷३ वा ६÷६ महिनामा हवाई उडान क्षेत्रको नियम परिमार्जन गरिने बताए । 

प्राधिकरणले २७ देखि ३१ जनावरीसम्म प्राधिकरण आन्तरिक र हवाई उडड्यन क्षेत्रमा लामो समय काम गरेका विज्ञहरुसँग छलफल गरेको थियो । 

त्यस छलफलबाट हवाई उडानमा पाँचवटा नियम लागू गर्ने तय गरिएको उनले बताए । 

प्राधिकरणको नियमित प्रक्रिया अनुसार नयाँ नियम लागू गर्न लागिएको भुलले बताए । 

उनले ‘विमान दुर्घटना भएका कारण नयाँ व्यवस्था लागू गर्न खोजिएको होइन । प्राधिकरणको नियमित प्रक्रिया अन्तर्गत नयाँ नियम लागू हुन लागेको हो ।’ 

के छ नयाँ नियममा ?

नयाँ व्यवस्थाअनुसार अब पाइलटले दैनिक आठ घन्टा उडान र आठ वटा मात्र अवतरण गर्न पाउने व्यवस्था गर्न लागेको उनले बताए । 

अहिले दैनिक १० घण्टा उडान र १० वटा अवतरण गर्न पाउने व्यवस्था छ । आईएफआर उडान हुने विमानस्थलमा भिएफआर उडान गर्न नपाइने नियम प्राधिकरणले बनाएको छ । 

त्यसैगरी, पहाडी क्षेत्रमा हुने उडान सट टेक अफ ल्यान्डिङ (स्टल)मा विमान जमिनको तहबाट सधैं ५०० फिट माथि हुनुपर्ने र सुगम क्षेत्रमा उडान गर्दा विमान जमिनको सतहबाट कम्तीमा एक हजार फिट माथि हुनुपर्ने नियम प्राधिकरणले बनाएको छ । 

उडानमा दुईभन्दा बढी चालक दलका सदस्य हुँदा थप समय उडान गर्न पाउने व्यवस्था खारेज गर्न लागिएको छ । वायुसेवा कम्पनीका सबै प्रशिक्षक पाइलटले विमान उत्पादक कम्पनीमा गई सीप परीक्षण गर्नुपर्ने व्यवस्था पनि प्राधिकरणले गर्न लागेको छ ।