नेपाल चिकित्सक सङ्घ : उपत्यकामा मतदान जारी

काठमाडाैँ – नेपाल चिकित्सक सङ्घको केन्द्रीय कार्यकारिणी समितिको नयाँ नेतृत्वका लागि आजदेखि उपत्यकामा निर्वाचन सुरु भएको छ । आज विहानदेखि नेपाल प्रज्ञा–प्रतिष्ठान कमलादीमा मतदान सुरु भएको प्रमुख निर्वाचन अधिकृत डा. धनबहादुर रानामगरले जानकारी दिए ।

यसअघि यही माघ ६ गते र ७ गते उपत्यका बाहिरका १६  शाखा कार्यालयमा निर्वाचन सम्पन्न भइसकेको छ । उपत्यका बाहिर ३ हजार ६५० मत खसेको उनले बताए।

उनका अनुसार आजदेखि उपत्यकामा ३ दिन माघ १९, २० र २१ निर्वाचन हुनेछ ।  ३ दिन उपत्यकामा ८ हजार ९ सय मतदाता निर्वाचनमा सहभागी हुँदैछन् । निर्वाचन साँझ ५ बजेसम्म सञ्चालन हुनेछ । 

निर्वाचनमा १ अध्यक्ष, १ वरिष्ठ उपाध्यक्ष, प्रत्येक प्रदेशबाट एक/एक जनाको दरले ७ जना उपाध्यक्ष, महासचिव १, कोषाध्यक्ष १, सहसचिव १, सहकोषाध्यक्ष १ जना र ६ जना सदस्य गरी १९ जनाको पदाधिकारीको निर्वाचन हुँदैछ । त्यसै सङ्घ परिषद् सदस्य ६० जनाकोसमेत निर्वाचन हुँदैछ । 

अध्यक्षमा ३ समूहले प्यानल बनाई चुनावी मैदानमा उत्रिनु भएको छ । अध्यक्षमा  डा अनिल विक्रम कार्कीको लोकतान्त्रिक, डा सन्तोष पौडेलको प्रगतिशील र डा शिवजी विक्रम सिलवालको स्वतन्त्र प्यानल बनाई चुनावी प्रतिस्पर्धा रहेका छन् । निर्वाचनमा कूल १२ हजार ८३४ जना मतदाता रहेका छन् । यही माघ २१ गते मतदान सकिएपछि मतगणना हुनेछ ।