काठमाडौं–कैलाली–२ बाट प्रतिनिधिसभा सदस्यमा विजयी अरुण चौधरी पक्राउ परेसँगै सांसद पदबाट निलम्बित भएका छन् । 
उनी नागरिक उन्मुक्ति पार्टीकोतर्फबाट उम्मेदवार भएर चुनाव जितेका थिए । 
ट्याक्टरमा आगजनी मुद्दामा ९ वर्ष भन्दा बढी समयदेखि फरार चौधरीलाई बिहीबार बाँकेबाट प्रहरीले पक्राउ गरेको हो । 
चौधरी पक्राउ परेको सूचना प्रहरीले संसद सचिवालयलाई जानकारी गराएपछि उनको पद स्वतः निलम्बित हुन्छ । 
प्रहरीबाट सूचना आएपछि संसद सचिवालयले उनी निलम्बनमा परेको सूचना टाँस गर्नेछ ।
संसद् बैठक बस्ने अवस्थामा भने सभामुखले सांसद निलम्बनको सूचना बैठकमै सुनाउनुपर्ने कानुनी व्यवस्था छ । 
संसद्को बैठक माघ २२ गते दिउँसो १ बजेका लागि बोलाइएको छ । बैठकअघि नै सचिवालयले सूचना टाँस गरेर चौधरी निलम्बित भएको प्रमाणित गर्नेछ ।
प्रहरीले चौधरीलाई धनगढी लैजाने तयारी गरेको छ । संसद्को कार्यकाल बाँकी रहँदै उनले कैद सजाय भुक्तान गरे भने पुनः सांसदका रूपमा क्रियाशील हुन पाउने छन् । 
नेपालको संविधानले प्रतिनिधिसभाको कार्यकाल सुरु भएपछि कुनै पनि सांसदलाई पक्राउ गर्न नपाउने विशेषाधिकार दिएको छ । तर, फौजदारी अभियोगमा भने त्यस्तो विशेषाधिकार कायम रहँदैन । 
फौजदारी अभियोगमा कुनै सांसदलाई पक्राउ गरेको अवस्थामा प्रक्राउ गर्ने निकायले संसद्को प्रमुख अधिकारीलाई तुरुन्त सूचना दिनुपर्ने कानुनी प्रावधान छ ।