म्याग्दी – भौगोलिकरूपमा विकट र दुर्गम क्षेत्रमा अवस्थित म्याग्दीको धवलागिरि गाउँपालिका-२ को खोरिया र लमसुङगाउँ सडक सञ्जालमा जोडिएका छन् । वडा नं ३ मा पर्ने गाउँपालिकाको केन्द्र मुनाबाट महतला हुँदै खोरिया र २ नं वडा कार्यालय रहेको लमसुङ जोड्ने सडक निर्माण सकिएको हो । विसं २०७४ देखि सुरु भएको सडक निर्माणले पूर्णता पाएसँगै यातायातका साधन सञ्चालन हुन थालेका छन् ।
धवलागिरि गाउँपालिका–२ का वडाध्यक्ष अकप्रसाद विकले सडक निर्माण भएपछि स्थानीयवासीमा खुसीयाली छाएको बताए । 'बस र जीप सञ्चालन भएपछि लुलाङ, लमसुङ, खोरिया र गुर्जाका पाँच सयभन्दा बढी घरधुरी लाभान्वित भएका छन्,' उनले भने । मुनाबाट लमसुङसम्मको ७ किलोमिटर दूरीको सडकमा यातायात सञ्चालन हुन थालेका र लमसुङबाट लुलाङ हुँदै गुर्जा जोड्ने सडकको १ किलोमिटरभन्दा बढी मार्ग खोलिसकिएको छ । मुना–लुलाङ सडकअन्तर्गत पर्ने महतला भिरमा खनिएको सडक स्तरोन्नति भएपछि गत हप्तादेखि यातायातका साधन चल्न थालेका हुन् ।
गाउँपालिकाका उपाध्यक्ष रेशम पुनमगरका अनुसार गण्डकी प्रदेश सरकारले विनियोजन गरेको १० लाख बजेटबाट पूर्वाधार विकास कार्यालयले महतलाको भिरमा ग्रेड सुधार गरेर गाडी चल्ने बनाएको हो । सो ठाउँमा सडक ढलानको काम थालिएको छ ।
गत वर्ष करिब १ सय मिटर मार्ग खोलिएको सडकको ग्रेड नमिलेका कारण यातायातका साधन सञ्चालन हुनसकेको थिएन । महतलामा ३ वर्षअघि सडक पुगेको थियो । गाउँपालिकाका उपाध्यक्ष पुनका अनुसार लमसुङबाट लुलाङ हुँदै गुर्जा जोड्ने सडक निर्माणको काम पनि भइरहेको छ ।
अक्करे पहाडमा करिब १ सय मिटर दूरीमा चट्टान काटेर मार्ग खोलिए पनि ग्रेड मिलाउन र फराकिलो बनाएर यातायातका साधन चल्न योग्य बनाउन यसपालि योजनालाई निरन्तरता दिइएको थियो । खोरियाका मतिप्रसाद पाइजाले अक्करे पहाड छिचोलेर खोलिएको सडकमा यातायात सञ्चालन भएपछि सहज भएको बताए।
'सडक यातायातको सुविधा नहुँदा गाडी चढ्न हिँडेर महतलाको भिरसम्म पैदल हिँड्नुपर्ने बाध्यता थियो, गाउँमै गाडी चल्न थालेपछि यात्रा अवधि छोटिएको र ढुवानी खर्च घटेको छ,' उनले भने । लुलाङ–गुर्जा सडक निर्माणका लागि धवलागिरि गाउँपालिकाले ४५ लाख र गण्डकी प्रदेश सरकारले ८० लाख विनियोजन गरेका छन् । सो बजेटबाट मजदुर परिचालन गरेर लमसुङबाट लुलाङतर्फ सडक निर्माण भइरहेको उपभोक्ता समितिका सचिव ज्ञानबहादुर पाइजाले बताए। बस्तीमाथि सडक खन्दा जोखिम हुने भएकाले डोजरका विकल्पमा मजदुर परिचालन गरिएको उनले बताए।
