1675586465.jpg)
काठमाडौँ– नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले कांग्रेस सत्तारूढ दलको गठबन्धन भत्काउने प्रयासमा लागेको तर सफल नहुने दाबी गरेका छन् ।
आइतबार प्रतिनिधिसभाको बैठकमा बोल्दै ओलीले सरकारमा आउन कांग्रेसले प्रधानमन्त्रीलाई विश्वासको मतमार्फत ढोक्सा थापिरहेको र त्यो रित्तै हुने दोहोर्याएका हुन् ।
प्रधानमन्त्रीले विश्वासको मत लिने संसद् बैठकमा पनि ओलीले सोही अभिव्यक्ति दिएका थिए ।
‘साँझ ढोक्सा थापिन्छ– अँध्यारोमा माछा मार्ने उद्देश्यले । बिहान हेर्दा ढोक्सा रित्तै हुन्छ । रित्तो ढोक्सा बोक्यो घर फर्कियो’, ओलीले भने ।
कांग्रेसले प्रधानमन्त्रीलाई ललाई फकाई गरिहेको भन्दै संसद्मा बूढो बाघ र एउटी महिलाको कथा सुनाए ।
यस्तो छ ओलीले सुनाएको कथा–
एउटा बूढो बाघ रहेछ । त्यसले एक जना महिलालाई झम्टेर मारेछ । बाघले महिलालाई खायो । ती महिलाले सुनको बाला लगाएकी रहिछन् । मान्छे खाए पनि बाला बाँकी रह्यो ।
बाघ बूढो भएका कारण बाहिर निस्कन नसक्ने भयो । गुफामा बस्दो रहेछ र बाहिर हिँड्ने मान्छेलाई त्यही सुनको बाला देखाउँदो रहेछ ।
मान्छेले त्यो बाला अलि पर फ्याँकिदिनुस् न भन्दा नजिकैबाट दिन्छु, हातैमा मात्रै दिन्छु भन्दो रहेछ । जब बाला लिन नजिक गयो झ्याप्पै पार्नेरहेछ ।
अहिले साथीहरू बाला देखाइरहनुभएको छ ।
कथा सुनाएपछि ओलीले भने, ‘सरकारमा रहेका दलहरूले आफ्नो र देशको बारेमा बुझेका छन् र सुनको बाला टिप्न जाने कोही छैनन् ।’
पुस १० सम्म निषेधको राजनीति रहेको र अहिले भने त्यो निषेधको राजनीति सहमतिको राजनीतिमा उल्टिएको ओलीले बताए ।
‘पुस १० सम्मको निषेधको राजनीति फ्याट्ट उत्तानो परेको छ । र त्यो सहमतिका
राजनीति भएको छ’, ओलीले बताए ।
राष्ट्रिय सहमतिको नाममा कांग्रेसले सरकार ढाल्ने प्रयास गरिरहेको दाबी गर्दै भने– ट्राई योर बेस्ट ।
