काठमाडौँ– राष्ट्रिय जनमोर्चाका अध्यक्ष चित्रबहादुर केसीले सरकारको प्रधानमन्त्री पुष्पकमल दाहाल प्रचण्ड नभई केपी शर्मा ओली नै भएको दाबी गरेका छन् ।
आइतबारको प्रतिनिधिसभा बैठकमा बोल्दै केसीले एमाले अध्यक्ष केपी शर्मा ओलीले संसद्मा बोलेको विषय सुन्दा प्रधानमन्त्री पुष्पकमल नभएर केपी ओली नै भएको बताए ।
‘पूर्वप्रधानमन्त्रीले जे बोल्नुभयो, त्यसले नयाँ आएका व्यक्तिलाई आश्चर्य लाग्न सक्छ । उहाँले रणभूलमा पार्न सक्नुहुन्छ । प्रवासमा बस्नेहरूको सन्दर्भमा गोहीको आँसु चुहाउनुभयो । उहाँको सबै बोलीबाट सरकारको प्रधानमन्त्री पुष्पकमल होइन, उहाँ (ओली) नै हो’, केसीले भने ।
नेपाली कांग्रेसले राष्ट्रपतिमा दाबी गरिरहेका कारण ओलीको सातो गएको पनि केसीले सुनाए ।
‘नेपाली कांग्रेसले राष्ट्रपतिमा जुल्कीमुल्की गरेको हुनाले सातोपुत्लो गएको छ’, केसीले भने, ‘प्रचण्डले सहमतिमा जानुपर्छ भनेर प्रस्ताव ल्याउनुभएको छ । उहाँ (ओली) त २६ गते नै आतंकित हुनुभयो ।’
प्रवासमा बस्ने नेपालीलाई मतदानको अधिकार दिने विषयमा कुरा गरेर ओलीले गोहीको आँसु चुहाएको पनि केसीले बताए ।
रवि लामिछानेको नागरिकताबारे सर्वोच्चको फैसलामाथि ओलीले प्रश्न उठाएको सन्दर्भ उल्लेख गर्दै केसीले प्रश्न गरे, ‘सर्वोच्च अदालतको फैसला उहाँले पालना गर्नुभयो ?’
