जनकपुरधाम –मन्त्रालय भागबन्डामा विवाद भएपछि मधेश प्रदेश सरकारमा सहभागी नभएको माओवादी केन्द्र अन्ततः १ मन्त्री र १ राज्यमन्त्री लिएर सरकारमा जाने भएको छ ।
२० माघमा भएको मन्त्रिपरिषद् विस्तारमा सहभागी नभएको माओवादी केन्द्र मङ्गलबार सरकारमा सहभागी हुन लागेको हो ।
माओवादीले उद्योग, पर्यटन तथा वन मन्त्रालय र १ राज्यमन्त्री पाउने भएको छ । उद्योग मन्त्रालयमा माओवादी केन्द्रले सुनिता यादवलाई पठाउने भएको छ । त्यस्तै उद्योग, पर्यटन तथा वन राज्यमन्त्रीमा रहबर अन्सारीले जिम्मेवारी पाउँदै छन् ।
मधेस प्रदेशमा माओवादी केन्द्रका ९ सांसद छन् । २० माघमा मन्त्रिपरिषद् विस्तार हुँदा माओवादी केन्द्र पार्टी अध्यक्ष पुष्पकमल दाहाल ‘प्रचण्ड’कै निर्देशनमा सरकारमा सहभागी भएको थिएन । माओवादीलाई १ मन्त्री र १ राज्यमन्त्री मात्रै दिने अडान मुख्यमन्त्रीले राखेपछि अन्ततः माओवादी सरकारमा सहभागी हुन लागेको जनाइएको छ ।
दुवै मन्त्रीको शपथ मङ्गलबार दिउँसो हुने मुख्यमन्त्री कार्यालयले जनाएको छ ।
