दोधारा चाँदनी - शुक्लाफाँटा राष्ट्रिय निकुञ्जबाट निस्किने वन्यजन्तुबाट भीमदत्त नगरपालिकाका किसान हैरान छन् । निकुञ्जसित जोडिएका बस्तीका किसानलाई खेतमा लगाएको अन्न र तरकारी खेती जोगाउन सकस भएको छ ।
निकुञ्जबाट निस्किने चित्तल र बँदेललगायतका वन्यजन्तुले तरकारी खेती खाएर हैरान गरेको किसान बताउँछन् । निकुञ्जबाट बस्ती छिर्ने वन्यजन्तुले किसानको तरकारी खेतीमा नोक्सानी पु¥याउन थालेपछि जोगाउनमै मुस्किल परेको भीमदत्त नगरपालिका-१६ नयाँ बस्तीका नाथुराम रानाले बताए। उनले तरकारी जोगाउन बारीमा जाग्राम बस्न बाध्य भएको बताए।
विसं २०६३ देखि तरकारी खेती गर्दै आएका रानाले तरकारी जोगाउन हरेक वर्ष खेतमै बास बस्नुपर्ने बाध्यता रहेको सुनाए।
'निकुञ्जका वन्यजन्तुले खेती नष्ट गरिदिन्छन्, झुपडीमा रात बिताएर तरकारी बचाउनुपर्छ,' तरकारी लगाएको खेतको छेउमा रहेको झुपडी देखाउँदै उनले भने ।
निकुञ्जबाट आउने जनावरले तरकारी खानुका साथै नष्ट गरेर जाने गरेको उनले बताए ।
'जङ्गलबाट हात्ती आउने डर हुन्छ, राति डरैडरले बस्नुपर्छ, गत वर्ष राति तरकारी खेतीमा आएको बँदेलले गाउँकै एक जनालाई आक्रमण गरेको थियो,' उनले भने ।
रानाले १५ कठ्ठामा खेती गर्दै आएका छन्।
'तरकारी खेती गरेरै घर खर्च र छोराछोरीको पढाइ खर्च चलाइराखेको छु, वन्यजन्तुबाट खेती जोगाउन सके वार्षिक ३ लाखसम्म आम्दानी हुन्छ ,' उनले भने ।
यहाँ बसोबास गर्ने ४१ राना परिवार तरकारी खेती गरेरै जीविकोपार्जन गरिरहेका सुदामा रानाले बताए।
'यहाँ सबैले समूहमा मिलेर तरकारी खेती सुरु गरेका छौँ, अन्य बालीभन्दा तरकारी खेतीबाट तीन गुना बढी फाइदा हुन्छ,' उनले भने।
तरकारी खेतीबाट मनग्य आम्दानी हुने भए पनि खेती जोगाउन मुख्य चुनौती रहेको अर्का किसान कैलाशु रानाले बताए ।
'खेती जोगाउन खेतमा बास बस्नुपर्ने बाध्यता छ । निकुञ्जले तारजाली लगाए पनि वन्यजन्तु आउन छाडेका छैनन्, खेती सुरु गर्ने बेलादेखि भित्र्याउने बेलासम्म खेतमै बास बस्नवुपर्छ, उनले भने । डेढ दशकदेखि तरकारी खेती गर्दै आएका यहाँका किसानले भारतबाट आयात गरिने तरकारी चुनौती बनेको बताए ।
