काठमाडौँ –सरकारले डा.जयकान्त राउतलाई राष्ट्रिय योजना आयोगको सदस्यमा नियुक्त गरेको छ।
प्रधानमन्त्री पुष्पकमल दाहाल ‘प्रचण्ड’ले डा. राउतलाई आयोगको सदस्यमा नियुक्त गरेका हुन् । उनी नेपाल विज्ञान तथा प्रविधि प्रतिष्ठान (नास्ट) का वरिष्ठ कृषि वैज्ञानिक समेत हुन् । डा. राउत २०७९ को आम निर्वाचनको समयमा नास्टको पदबाट राजीनामा दिएर सप्तरी–२ बाट प्रतिनिधिसभा सदस्यमा उम्मेदवार भएका थिए ।
आयोग सदस्य डा. राउत जनमत पार्टीका अध्यक्ष डा.सिके राउतका दाजु हुन् । अध्यक्ष राउतले पार्टीबाट उनको नाम सिफारिस गरेपछि प्रधानमन्त्रीले उनलाई सदस्यमा नियुक्त गरेका हुन् ।
निर्वाचनमा पराजित आफ्नै दाजुलाई योजना आयोगमा सिफारिस गरेपछि पार्टीभित्र र बाहिर अध्यक्ष राउतको आलोचना सुरु भएको छ । यसअघि पनि अध्यक्ष राउतले आफन्त बबिता राउतलाई समानुपातिक प्रणालीबाट मधेस प्रदेश सभामा ल्याएका हुन् । उनी अहिले उपसभामुख छिन् ।
