काठमाडौँ– नागरिक उन्मुक्ति पार्टीकी अध्यक्ष रञ्जिता श्रेष्ठले आफूहरूले आत्मसमर्पन नगर्ने बताएकी छिन् । 

बिहीबार फेसबुकमा नागरिक उन्मुक्ति पार्टीका सांसदहरूको तस्बिर पाेस्ट गर्दै श्रेष्ठले लेखेकी छिन्, ‘हार्नेहरूले हो आत्मसमर्पण गर्ने ! योद्धाहरू त सहिद भएर मर्छन्, तर परिचय मर्न दिँदैनन् ।’ 

नागरिक उन्मुक्ति पार्टीले रेशम चौधरीलाई जेलबाट रिहा नगरेसम्म सुदूरपश्चिम प्रदेश सरकारलाई विश्वासको मत नदिने निर्णय गरेको छ । 

सुदूरपश्चिम सरकारका मुख्यमन्त्री राजेन्द्रसिंह रावलले आजसम्म विश्वासको मत पाएनन् भने उनको सरकार स्वतः ढल्छ । 

नागरिक उन्मुक्ति पार्टीलाई फकाउन बुधबार एमाले अध्यक्ष केपी शर्मा ओलीले रञ्जिता श्रेष्ठसँग छलफल गरेका थिए । तर, ओलीले श्रेष्ठको विश्वास जित्न सकेनन् । 

सुदुरपश्चिम प्रदेशसभा बैठक आज दिँउसो १ बजेका लागि बोलाइएको छ । उक्त बैठकमा मुख्यमन्त्रीको विश्वासको मतसम्बन्धी छलफल हुने एजेन्डा छ । 

श्रेष्ठले एकै देशका दाजुभाइमाथि थिचोमिचो गरिएको र त्यसले देशलाई ओरालो बाटोमा लैजाने बताएकी छिन् । 

‘आफ्नो देश समृद्धिमा पुगोस् भन्ने कसको चाहना हुन्न र ? तर, एकै देशका दाजुभाइमाथि गरिएको थिचोमिचोले मुलुक उकालो होइन, ओरालोतिर लाग्छ ।'

आफूहरूले देश मागेर विद्रोह गरेकाे नभई मुलुककाे समृद्धिका लागि समानुपातिक सहभागिता मात्रै खाेजेकाे उनले बताएकी छिन ।

श्रेष्ठले नागरिक उन्मुक्ति पार्टी बलियो रहेको र त्यसमाथिको आक्रमण दुस्साहस मात्रै हुने टिप्पणी गरेकी छिन् । 

उनले भनेकी छन्, ‘हिजो आयातितले बजार धान्थे आज हामी आफैँ सक्षम छौँ । सतहमा दह्रो पिल्लर छ, भूकम्पले समेत हल्लाउन नसक्ने पिल्लरमा २-३ घन दुस्साहस मात्रै हो ।’

मुलुक समृद्ध बनाउन श्रम चाहिने भन्दै उनले भनेकी छिन्, ‘भलो यसैमा छ, मुलुकीय तलामा तपाईंको पनि साथ रहोस् । श्रमले मुलुक समृद्धशाली बन्छ, आश्वासित शब्दले होइन ।’