काठमाडौँ –जी मिडिया कनेक्सन प्रालिको ब्यानरमा निर्मित नेपाली सिरिज ‘लाल बहादुर, द स्पार्क’को ट्रेलर सार्वजनिक भएको छ । देवजंग थापाको लेखन तथा निर्देशन रहेको सिरिजमा लोकप्रिय कलाकारहरू सरोज खनाल, सुनिल थापा, कमेडियन खड्ग बहादुर पुन (खबपु)को मुख्य भूमिका रहेको ट्रेलरमा देखाइएको छ ।
२०७२ सालको विनाशकारी भूकम्पपछि पानीको मुहान सुकेको गाउँमा पानी ल्याउन गरेको प्रयासको कथा रहेको सिरिज ४ सिजन गरी जम्मा ५२ एपिसोडको रहने र पहिलो सिजन १३ एपिसोडको रहेको निर्देशक थापाले जानकारी दिए ।
प्रकाश आङ्बुहाङ (हाङबारे) निर्माता रहेको ‘लाल बहादुर, द स्पार्क’ मा सरिता राजोपाध्याय, लक्ष्मीनाथ तिमिल्सिना, गीता थापा पराजुली, रामबाबु रेग्मी, अनिता गिरी, जेनिस अधिकारी, रविन विष्ट, विश्व मुखिया लगायत कलाकारको अभिनय छ ।
नवीन डाँगी निर्माण नियन्त्रक रहेको सिरिजमा, नरेन्द्र लामा र स्वस्तिमा कार्कीको सहनिर्देशन, प्रनुप थापाको संवाद, इसिसि स्टुडियोको प्रोडक्सन, मदन न्यौपानेको श्रृङगार, विवेक उप्रेतीको सम्पादन र संजिव सुब्बाको सगीत रहेको छ ।
फाल्गुन पहिलो हप्ताबाट साप्ताहिक रुपमा प्रसारणमा आउने यो सिरिज जी मिडिया कनेन्कसनको युट्युव च्यानल र एक टेलिभिजनबाट एकसाथ प्रसारण हुने निर्माण पक्षले जनाएको छ ।
