चितवन –भरतपुर महानगरपालिकाले २५ करोड ९५ लाख ४१ हजार रुपैयाँको पूरक बजेट ल्याएको छ ।
शुक्रबार १२ औं नगर सभाको बैठकमार्फत पूरक बजेट ल्याइएको हो । उपमेयर चित्रसेन अधिकारीले विनियोजन ऐन, २०७९ ले चालु आर्थिक वर्षको लागि विभिन्न बजेट खर्च शीर्षक तथा उपशीर्षक अन्तर्गत खर्च गर्न दिएको अख्तियारी रकम पर्याप्त नभएकले पूरक बजेट ल्याउनु परेको बताए ।
चालू आर्थिक वर्षको लागि विनियोजन ऐनले अख्तियारी नदिएको नयाँ खर्च शीर्षकमा खर्च गर्न आवश्यक भएको, विभिन्न खर्च शीर्षक तथा उपशीर्षकअन्तर्गत नयाँ कार्यक्रम थप एवं संशोधन गर्नुपरेको उनले बताए ।
महानगरले आर्थिक वर्ष २०७९÷०८० कालागि ५ अर्ब ८४ करोड ४२ लाख ५६ हजार रुपैयाँ बजेट विनियोजन गरेको थियो । जसमध्ये चालूतर्फ विनियोजित २ अर्ब ५३ करोड १३ लाख ५८ हजारमा पुस मसान्तसम्ममा ८८ करोड ६३ लाख १९ हजार रुपैयाँ अर्थात् (१७ प्रतिशत) खर्च भएको छ ।
पूँजिगत खर्चतर्फ विनियोजित ३ अर्ब ३१ करोड २८ लाख ९८ हजार रुपैयाँमा पुस मसान्तसम्म ५३ करोड ८३ लाख १७ हजार रुपैयाँ अर्थात् (३५ प्रतिशत) खर्च भएको छ । महानगरले यस वर्ष १ अर्व ५० करोड रुपैयाँ आन्तरिक आम्दानी प्रक्षेपण गरेकोमा पुस मसान्तसम्म जम्मा ३४ करोड ३४ लाख २९ हजार रुपैयाँ अर्थात्(२२ प्रतिशत) संकलन भएको छ ।
आर्थिक वर्ष २०७९÷०८० मा सञ्चित कोषमा मौज्दात रहेको रकम १ अर्ब ७ करोड ५ लाख, विनियोजन चालु तथा पुँजिगततर्फ फ्रिजभई संचित कोषमा फिर्ता गरिएको रकम ४८ करोड ४५ लाख ४१ हजार रुपैयाँ गरी जम्मा एकमुष्ठ १ अर्ब ५५ करोड ९५ लाख ४१ हजार रुपैयाँ सञ्चित कोषमा रहेको थियो ।
