टर्कीको पूर्वी भाग र छिमेकी सिरियामा सोमबार बिहान गएको भूकम्पमा परी शुक्रबारसम्म २२ हजार ३६८ जनाको मृत्यु भइसकेको छ । भूकम्पमा परेर दशौँ हजार घाइते भएका छन् ।
उद्धारकर्मीहरूका अनुसार टर्कीमा १८ हजार ९९१ जना तथा सिरियामा ३ हजार ३७७ जनाले ज्यान गुमाएका छन् । सिरियाको सरकार नियन्त्रित क्षेत्रमा १ हजार ३४० जना हताहत भएका छन् भने विद्रोही पकड जमाएको भूभागमा २ हजार ३७ जनाले ज्यान गुमाएका छन् ।
टर्की र सिरियाले अन्तर्राष्ट्रिय सहायताका निम्ति अपील गरेका छन् । विश्व ब्याङ्कले १ अर्ब ७८ करोड अमेरिकी डलर राहत सहायता उपलब्ध गराउने प्रतिबद्धता व्यक्त गरेको छ ।
सोमबार बिहान टर्कीको गाजियान्टेप प्रान्तमा ७.८ म्याग्निट्यूडको भूकम्प गएको थियो । नेपालमा सन् २०१५ मा आएको विनाशकारी भूकम्प पनि ७.८ म्याग्निट्यूडकै थियो । यस्तै सोही दिन दोस्रो भुइँचालो ७.५ म्याग्निट्यूडको गएको थियो।
टर्कीमा आएको पहिलो भूकम्पको केन्द्रबिन्दु जमिनको सतहभन्दा केवल १८ किलोमिटर मुनि थियो ।
