लामो समयपछि ग्रीसका विदेशमन्त्री टर्की पुगे

एथेन्स– गत सोमबारको भूकम्पबाट क्षतविक्षत भएको टर्की सरकार तथा त्यहाँका जनताप्रति ऐक्यबद्धता जनाउन ग्रीसका विदेशमन्त्री निकोस डेन्डिया टर्की भ्रमणमा गएका छन् । 

हेलिकप्टरबाट टर्कीको भूमिमा ओर्लदाँ उनलाई टर्कीका उनका समकक्षी  मेभलुत काभुसोग्लुले स्वागत गरे । 

लामो समयदेखि दुवै देशबीच प्रतिद्वन्द्वता रहे पनि प्राकृतिक विपत्तिको यो विषम परिस्थितिमा सहयोग गर्न ग्रीसका विदेशमन्त्री टर्की गएका हुन् । भूकम्प प्रभावित क्षेत्रको पनि उनले भ्रमण गर्ने कार्यक्रम छ । 

ग्रीसका विदेशमन्त्री डेन्डिया भूकम्पपछि टर्कीको भ्रमण गर्ने युरोपेली मुलुकको पहिलो मन्त्री हुन् ।

ग्रीसका उद्धारकर्मीले खोज तथा उद्धारमा सहयोग गरिरहेका अन्टाक्याका केही स्थानमा दुवै  देशका मन्त्री पुगेका छन् । ग्रीसले धेरै राहत सामग्री टर्कीलाई उपलव्ध गराएको छ ।

हालसम्म उसले ८० टन औषधि तथा प्राथमिक उपचारका सामग्री प्रदान गरिसकेको छ । 

टर्कीको पूर्वी भाग र छिमेकी सिरियामा गत सोमबार भएको भूकम्पमा परी  २९ हजार एक सय १७ जनाको मृत्यु भएको छ भने हजारौँ घाइते भएका छन् ।

टर्कीमा २४ हजार छ सय १७ जनाको ज्यान गएको छ भने सिरियामा चार हजार पाँच सय जना मारिएका छन् ।