काठमाडौँ –गायक रामकृष्ण ढकाल तथा गायिका अञ्जु पन्तको स्वरमा ‘जिम्बु झानेर’ को म्युजिक भिडियो सार्वजनिक भएको छ ।
प्रणय दिवसको पूर्व सन्ध्यामा प्रेमिल जोडीहरूलाई लक्षित गर्दै यस रोमान्टिक गीतको भिडियो सार्वजनिक गरिएको हो ।
भिडियो गायक ढकालको अफिसियल यूट्युब च्यानलमार्फत प्रिमियर भएको छ ।
गीतमा निरज सिग्देलको शब्द रचना छ भने शिखर सन्तोषको संगीत छ । भिडियोमा अभिनेता आकाश श्रेष्ठ र मोडल गृष्मा तामाङको अभिनय छ । सार्वजनिक भिडियोकी निर्देशक दीपा शाक्य हुन् ।
निर्देशक शाक्यले २० वर्ष अगाडि अभिनयमार्फत आफ्नो यात्रा सुरु भएकोमा अहिले आएर निर्देशन गरिरहेको बताइन् । ‘जिम्बु झानेर’ उनको तेश्रो म्यूजिक भिडियो हो । उनी केहि समय बेलायत बसेर नेपाल आएकी हुन् ।
गायक ढकालले मोडल तामाङको प्रशंसा गरे । उनले अभिनेता आकाश श्रेष्ठलाई नै टक्कर दिएर अभिनय तथा नृत्य गरेको बताए । ढकालले आफू अझै पूर्ण गायक नबनिसकेको बताउँदै आफूले गायनमा निरन्तरता मात्र दिएको बताए । ढकालले अहिलेसम्म लगभग ५ हजार गीतमा स्वर दिएका छन् ।
भिडियोको छायांकन कास्कीको घान्द्रुक र पोखरामा भएको हो ।
