काठमाडौँ– अभिनेता अनमोल केसी र आना शर्माकोे मुख्य भूमिका रहने सिनेमा ‘जेरी २’ को थिम पोस्टर सार्वजनिक गरिएको छ ।
सार्वजनिक पोस्टरमा एक युवालाई ब्याग बोक्दै लौरी टेकेर यात्रामा हिँडिरहेको देख्न सकिन्छ ।
हेमराज बिसीको निर्देशनमा निर्माण हुने सिनेमामा पूर्णिका सिजापतिको पनि मुख्य भूमिका रहनेछ । ८ वर्षअघि निर्माण भएको सुपरहिट सिनेमा ‘जेरी’को सिक्वेलका रूपमा यो सिनेमा निर्माण हुँदै छ ।
सिनेमामा अभिनय गर्ने अन्य कलाकारका लागि निर्माण पक्षले दार्जीलिङ, सिक्किम र गान्तोकमा अडिसनसमेत गरेको थियो ।
अनन्या फिल्मस् र नेपकम्स ग्लोबलको ब्यानरमा निर्माण हुने ‘जेरी अन टप’लाई सरोज न्यौपाने र रामकृष्ण श्रेष्ठले निर्माण गर्नेछन् ।
सिनेमाको कथा, पटकथा तथा संवाद निर्देशक बिसी र विश्वास तिम्सिनाले लेखेका हुन् ।
फागुन अन्तिम साताबाट फ्लोरमा जाने सिनेमाको छायांकन अस्ट्रेलिया, अमेरिका र सगरमाथा क्षेत्रलगायत रमणीय स्थानमा गरिनेछ ।
