काठमाडौँ– प्रतिनिधिसभाको शून्य समयमा बोल्दै सांसदहरूले जनजीविकामा परेका विभिन्न समस्या समाधानका लागि सरकारको ध्यानाकर्षण गराएका छन् ।

प्रतिनिधिसभाको बुधबार बसेको बैठकको शून्य समयमा बोल्दै सांसदहरूले जनजीविकाका समस्या समाधानका निम्ति सरकारको ध्यानाकर्षण गराएका हुन् । प्रतिनिधिसभा सदस्य लेखनाथ दाहालले प्रादेशिक अस्पताल सिन्धुलीमा सय शय्याको सञ्चालन अनुमति भए पनि ५० शय्याको मात्र सञ्चालन भइरहेको भन्दै सरकारको ध्यानाकर्षण गराए । 

उनले दक्ष जनशक्ति र प्रविधिको अभावका कारण सामान्य बिरामीलाई समेत बाहिरी अस्पतालमा रिफर गर्नुपर्ने अवस्था आएकाले सो अवस्थाको अन्त्य गर्न सरकारसँग माग गरे ।

यस्तै, सांसद विनिताकुमारी सिंहले निर्माण सुरु भएको १४ वर्ष भइसक्दा पनि हुलाकी राजमार्ग निर्माण हुन नसकेकोप्रति सरकारको ध्यानाकर्षण गराइन् । उनले सडक र पुल निर्माणमा चरम भ्रष्टाचार, लापरबाही र ढिलासुस्ती भएको भन्दै सम्बन्धित व्यक्ति, निकाय र ठेकेदारलाई कानुनी कारबाही गर्न माग गरिन् । 

यस्तै, प्रतिनिधिसभा सदस्य विद्या भट्टराईले पृथ्वी राजमार्गको मुग्लिन–पोखरा सडक २०८१ सम्ममा निर्माण सम्पन्न हुनुपर्नेमा सडकको प्रगति हालसम्म ५ प्रतिशत मात्र रहेको भन्दै छिटो सम्पन्न गर्न माग गरिन् । 

प्रतिनिधिसभा सदस्य विराजभक्त श्रेष्ठले बालाजुस्थित बसपार्कमा आन्दोलनको नाममा अमानवीय लुटपाट भएकाले दोषीलाई कारबाही गर्न माग गरे ।

प्रतिनिधिसभा सदस्य विश्वप्रकाश शर्माले आत्महत्याका घटना बढेको भन्दै आत्महत्या गर्न बाध्य पार्ने परिस्थितिको अन्त्य गर्न सरकारको ध्यानाकर्षण गराए । 

उनले भने, ‘मानसिक अस्वस्थता, पारिवारिक सम्बन्धको द्वन्द्व अनि व्यक्तिको आकांक्षा र परिवेशबीचको असन्तुलन आत्महत्याको मुख्य कारण निश्चय नै हुन् । तर असन्तुष्टि, आवेश र वितृष्णाका अनेक कारण निराकरण गरेर परिवेशमा परिवर्तन गर्नु जिम्मेवार राज्य, राजनीतिक दलहरू एवं असल समाजको कर्तव्य हुन्छ ।’

राजनीतिमा रूपान्तरण, सामाजिक विसंगतिहरूको अन्त्य, झन्झटिलो प्रशासनिक प्रक्रियामा सुधार र आर्थिक विषमताको अन्त्य गरी ४ विषयमा गम्भीर राष्ट्रिय विमर्श जरुरी रहेको उनको भनाइ थियो । 

प्रतिनिधिसभा सदस्य शक्तिबहादुर बस्नेतले स्वास्थ्य बिमा कार्यक्रमलाई विशेषज्ञ सेवाका निम्ति उपयोग गर्नुपर्ने बताए ।

यस्तै, प्रतिनिधिसभा सदस्य शिशिर खनालले बालाजुस्थित बसपार्कमा मजदुर आन्दोलनको नाममा भएको तोडफोडको योजनाकार र सहभागीलाई कारबाही गर्दै पीडित व्यवसायीलाई क्षतिपूर्ति दिन माग गरे ।

यस्तै, सांसद सरस्वती सुब्बाले भूमिहीन र सुकुमबासीको समस्या समाधान गर्दै उचित व्यवस्थापन गराउन सरकारसँग माग गरिन् । 

प्रतिनिधिसभा सदस्य सुमना श्रेष्ठले क्रिकेटर सन्दीप लामिछानेको मुद्दा कहिले टुंगो लाग्छ भनी प्रश्न गरिन् । बलात्कार आरोपी लामिछानेलाई राष्ट्रिय क्रिकेट टिममा राखिएको भन्दै आपत्तिसमेत जनाइन् ।

प्रतिनिधिसभा सदस्य सुरेन्द्रराज आचार्यले कपिलवस्तु जिल्लाका अधिकांश किसानको खेतीमा छाडा गाई, गोरुहरूले नोक्सान पुर्‍याएको भन्दै सम्बन्धित निकायको ध्यानाकर्षण गराए भने सूर्य थापाले बालाजु लुटपाटको घटनाको सरकारले संसद्मा जानकारी गराउनुपर्ने बताए ।