काठमाडौँ– राष्ट्रिय जनमोर्चाका सांसद चित्रबहादुर केसीले शक्ति राष्ट्रहरूले राष्ट्रपतिको चुनावमा अप्रत्यक्ष रूपले भूमिका खेल्ने गरे पनि यसपटक भने प्रत्यक्ष रूपमा नै भूमिका खेलेको आरोप लगाएका छन् ।
बुधबार प्रतिनिधिसभा बैठकमा बौल्दै सांसद केसीले यस्तो आरोप लगाएका हुन् । उनले शक्ति राष्ट्रहरूले यस पटक प्रत्यक्ष रूपमा आफ्नो देशको स्वार्थअनुकूल राष्ट्रपतिका लागि भूमिका खेलिरहेको बताए ।
यसले नेपालको स्वाभिमान, राष्ट्रियता र सार्वभौम अखण्डतामाथि दख्खल भइरहेको उनको भनाइ छ । सांसद केसीले नेपाली सरकार प्रमुखहरू विदेशी शक्ति राष्ट्रका मानिस आउँदा लम्पसार परेर उनीहरूको आशीर्वादबाट आफ्नो दुनो सोझ्याउने काम गरिरहेको दाबी गरे ।
उनले भारतको सामान्य कर्मचारी आउँदा पूर्वप्रधानमन्त्रीहरूदेखि मन्त्री र राष्ट्र प्रमुख नै लम्पसार परेको भन्दै यसले देशको इज्जत र प्रतिष्ठामा आँच आएको बताए ।
उनले भूगोलका हिसाबले राष्ट्र सानो, ठुलो भए पनि सार्वाभौमसत्ता, भौगोलिक अखण्डताका हिसाबले सबै बराबर हुने बताए ।
सांसद केसीले नेपालमा गणतन्त्रमाथिको खतरा गणतन्त्र पक्षधरहरूबाट नै रहेको समेत आरोप लगाए ।
