काठमाडौँ– उपराष्ट्रपति नन्दबहादुर पुनले नेपाली समाज रूपान्तरणमा चलचित्र क्षेत्रले खेलेको भूमिका अतुलनीय रहेको बताएका छन् ।
ग्लोबल टेलिभिजनमा प्रसारण भइरहेको टेलिचलचित्र ‘अब जे होला होला’ले ५१औँ भाग पूरा गरेको अवसरमा आयोजित कार्यक्रममा उनले चलचित्र मानव जीवनको अभिन्न अंग भइसकेको बताए ।
‘प्राचीन कालदेखि गहिरो जरा गाडेर बसेका अन्धविश्वास, कुरीति, विकृति र विभेदहरूलाई उदांगो पारेर अग्रगामी र सभ्य समाज निर्माणका लागि जनमानसमा प्रमुख प्रेरक माध्यमका रूपमा चलचित्रले भूमिका खेल्दै आएका छन्,’ उनले भने ।
भाषा, संस्कार, संस्कृति, गीत, संगीत, कला, साहित्यको संरक्षण र विकास चलचित्र क्षेत्रले गरिरहेको जनाउँदै उनले देशभक्ति भावले ओतप्रोत बनाउन तथा राष्ट्रिय एकताको प्रवद्र्धन, भौगोलिक अखण्डताको रक्षामा चलचित्रले योगदान पुर्याउँदै आएको बताए ।
नेपाली चलचित्र क्षेत्रमा टेलिचलचित्रको आफ्नै भूमिका रहेको उल्लेख गर्दै उनले विशेष गरी हास्य टेलिचलचित्रको प्रभाव र त्यसप्रतिको आकर्षण बढ्दै गएको बताए ।
‘समाजका विकृतिविरुद्ध प्रहार गर्दै सामाजिक रूपान्तरणको सन्देशसहित हास्य चेत मिसिएका यस प्रकारका चलचित्र आमनेपालीका लागि नियमित मनोञ्जनको प्रमुख माध्यम बनिरहेका छन्,’ उपराष्ट्रपति पुनले भने, ‘हास्य कलाकारको व्यंग्यकला मनोरञ्जनमात्रै नभई नीति निर्माण तहमा पनि प्रभाव पार्न सक्ने माध्यम बनेका छन् ।’
देशको राजनीतिक तथा सामाजिक रूपान्तरण, भाषा, संस्कृति, गीत, संगीत, साहित्यको संरक्षण, प्रवद्र्धनमा उच्चतम् योगदान दिने राष्ट्रका सम्पत्ति कलाकारलाई उचित सम्मान र पुरस्कृत गर्न आवश्यक रहेको उनको भनाइ छ ।
उनले भोलिका वरिष्ठ कलाकार, आजका प्रतिभावान् कलाकार जीविकोपार्जनका लागि बिदेसिनुपर्ने बाध्यता रोक्न सरकार र सबै पक्षको ध्यानाकर्षण गराए ।
कार्यक्रममा नेपालकी पहिलो नायिका भुवन थापा चन्द, वरिष्ठ कलाकार बसुन्धरा भुसाल, चैत्यदेवी सिंह, लय संग्रौलालगायत कलाकार, गीतकार, निर्माता, निर्देशक, सञ्चारकर्मी, प्राविधिकलाई सम्मान गरिएको थियो ।
