काठमाडौँ –प्रधानमन्त्री पुष्पकमल दाहाल ‘प्रचण्ड’ले काठमाडौंको गोंगबुमा भएको घटनाको छानविन गर्न सुरक्षा अंगका प्रमुखलाई निर्देशन दिएका छन् ।
प्रधानमन्त्री तथा मन्त्रिपरिषदको कार्यालय सिंहदरबारमा सुरक्षा निकायका प्रमुखलाई बुधबार बोलाएर घटनाको छानबिन गरी र अन्याय परेका सबैलाई न्याय दिन र दोषीलाई कारबाही गर्न निर्देशन दिएका हुन् ।।
गोंगबुमा सोमबार भएको घटनालाई आफूले गम्भीर रूपमा लिएको जनाउँदै प्रधानमन्त्रीले राजधानीमा नै यस प्रकृतिका घटना हुँदा सरकारले गम्भीरपूर्वक लिएका बताए ।
‘घटनाको पृष्ठभूमि के छ, के कारणले त्यस्तो अप्रिय घटना भयो, त्यसमा दोषी को को छन्, त्यो सबै कुराको गहिरो गरी अनुसन्धान गर्नुस् । लुटपाटको घटना झन् गम्भीर छ, त्यसमा दोषीलाई कारवाही गर्नुस् र जो जो पीडित छन्, उनीहरूले छिटोभन्दा छिटो न्याय पाउने वातावरण बनाउनुस्,’उनले भने ।
छलफलमा नेपाल प्रहरी, सशस्त्र प्रहरी बल र राष्ट्रिय अनुसन्धानका प्रमुखहरूले बसपार्क क्षेत्रमा केही विवाद भए पनि यति अप्रिय घटना होला भनेर आफूहरूले पूर्वअनुमान नगरेको तर्क दिए ।
गोंगबु घटनामा ३३ जना प्रहरी घाइते भएको, शान्तिसुरक्षाको पूर्वअनुमान गर्न नसकिएको, प्रहरीको सावधानीका कारण मानवीय क्षति नभएको र विवादकै बीच लुटेरा समूहले फाइदा उठाएको प्रारम्भिक अनुसन्धानको नतिजा प्रधानमन्त्रीलाई ब्रिफिङ गरिएको थियो ।
गृहमन्त्रालयको समेत जिम्मेवारी प्रधानमन्त्रीसँगै रहेकाले सुरक्षा निकायका प्रमुखलाई बोलाए प्रधानमन्त्री प्रचण्डले देशको शान्ति सुरक्षा कायम गर्न निर्देशन दिएका हुन् ।
