डर्टमुन्डसँग हार्यो चेल्सी, बेन्फिकाको क्वार्टरफाइनलमा पुग्ने सम्भावना मजबुत
काठमाडौँ– युइएफए च्याम्पियन्स लिग फुटबल प्रतियोगिताअन्तर्गत प्रि–क्वार्टरफाइनलको पहिलो लेगमा इंग्लिस क्लब चेल्सी जर्मन क्लब बोरुसिया डर्टमुन्डसँग पराजित भएको छ ।
गएराति भएको खेलमा चेल्सी घरेलु टोली डर्टमुन्डसँग १–० ले पराजित भएको हो । डर्टमुन्डका करिम एडियमीले दोस्रो हाफमा गरेको गोल नै निर्णायक बन्न पुग्यो । उनले ६३औँ मिनेटमा गोल गरेका थिए ।
सिग्नल इडुना पार्कमा स्टार खेलाडीले भरिएको चेल्सीले धेरै प्रयास गर्दा पनि नतिजा उल्टाउन सकेन । अन्ततः पहिलो लेग डर्टमुन्डले १–० ले जितेको छ ।
अब दोस्रो लेगको खेल चेल्सीले आफ्नो मैदानमा ७ मार्चको राति खेल्नेछ । त्यो बेला उसको ध्यान नतिजा उल्ट्याएर क्वार्टरफाइनलमा पुग्नु हुनेछ ।
यस्तै, गएराति नै भएको अर्को प्रि–क्वार्टरफाइनलको पहिलो लेगमा पोर्चुगिज क्लब बेन्फिकाले बेल्जियन क्लब ब्रुगलाई हराएको छ ।
बेन्फिकाले क्लब ब्रुगलाई उसकै मैदानमा २–० ले हराएर क्वार्टरफाइनलमा पुग्ने सम्भावना मजबुत बनाएको छ ।
बेन्फिकाको जितमा जोआओ मारियो र डेभिड नेरेसले एक–एक गोल गरे । दुवै गोल दोस्रो हाफमा सम्भव भएका थिए ।
अब दोस्रो लेग ७ मार्चमा बेन्फिकाको मैदानमा हुँदैछ ।
