काठमाडौँ– राष्ट्रिय स्वतन्त्र पार्टीका सभापति रवि लामिछानेले कांग्रेस नेता तथा सांसद चन्द्र भण्डारीको स्वास्थ्यलाभको कामना गर्दै उनको उपचारमा कुनै कमी नहोस् भनेर प्रधानमन्त्री पुष्पकमल दाहाल प्रचण्डसँग अनुरोध गरेको बताएका छन् ।

उनले सामाजिक सञ्जाल ट्विटरमा लेखेका छन्, ‘प्रिय चन्द्र भण्डारी दाइ, म अन्तरआत्मादेखि नै तपाईँ र ममतामयी आमाको स्वास्थ्यलाभको कामना गर्दछु । तपाईँको उपचारमा कुनै कमी नहोस् है भनेर भर्खरै प्रधानमन्त्रीज्यूलाई पनि विनम्र अनुरोध गरेको छु। सिंगो पार्टीसमेत तपाईँको शीघ्र  स्वस्थलाभको कामना गर्दछ ।’

नेता भण्डारी र उनकी आमा हरिकला भण्डारी ग्यास सिलिन्डर विस्फाेटका कारण घाइते भएका छन् । नेपालमा उपचार सम्भव नभएपछि उनीहरूलाई भारत लाने तयारी भइरहेको छ ।