पोखरा– पोखरामा शनिबार आयोजना गरिएको १७औँ संस्करणको सफल पोखरा अन्तर्राष्ट्रिय म्याराथनमा विभिन्न १६ देशका धावकले प्रतिस्पर्धा गर्ने भएका छन् ।
नेपालसहित केन्या, इथियोपिया, सर्विया, इजिप्ट, अमेरिका, स्विट्जरल्यान्ड, अस्ट्रेलिया, रसिया, फिलिपिन्स, हङकङ, फ्रान्स, बेलायत, पोल्यान्डलगायत देशबाट धावकले नाम दर्ता गराएको म्याराथन आयोजक नेपाल भूतपूर्व खेलाडी मञ्चले जनाएको छ ।
म्याराथनमा ७ वटै प्रदेशबाट ३७ जिल्लाका धावकले सहभागिता जनाउने छन् । पोखरा रंगशालामा हुने सो म्याराथनलगायत सबै विधामा गरी हालसम्म ८ हजार जनाले नाम दर्ता गराएको मञ्चका अध्यक्ष हरिप्रसाद पराजुलीले जानकारी दिए ।
यस वर्षको खुला म्याराथनमा १५० धावक सहभागी हुने बताइएको छ । महिलातर्फको हाफ म्याराथनमा ३५ धावक उपाधिका लागि प्रतिस्पर्धा गर्नेछन् ।
यसैगरी १० किलोमिटर पुरुषतर्फको दौडमा १ हजार ५०० र महिलातर्फ ६०० जनाले नाम दर्ता गराएका छन् ।
५ किलोमिटर दौडमा ७० विद्यालयका छात्र र छात्रतर्फ क्रमशः १ हजार ६०० जना र ६०० जनाले नाम दर्ता गराएका पराजुलीले जानकारी दिए ।
ह्विलचेयरतर्फ ४७, दृष्टिविहीन दौडतर्फ ९० र ‘रन फर फन’तर्फ ५ हजार जनाले नाम दर्ता गराएका छन् ।
म्याराथन ९४२/१९५० किमी दौडका विजेताले ५ लाख, द्वितीयले ३ लाख र तृतीय हुने टोलीले २ लाख पुरस्कार प्राप्त गर्नेछन् ।
मञ्चले गण्डकी प्रदेशका धावकका लागि छुट्टै पुरस्कारको व्यवस्था गरेको छ । गण्डकीबाट सहभागी हुने धावकलाई प्रथम, द्वितीय र तृतीय पुरस्कार क्रमशः ५० हजार, ३० हजार र २० हजार प्रदान गरिने छ ।
महिलातर्फको हाफ म्याराथनमा च्याम्पियनलाई १ लाख ५० हजार, द्वितीयलाई १ लाख, तृतीय हुनेलाई ७५ हजार र सान्त्वना पुरस्कार स्वरूप १५ हजार प्रदान गरिने छ ।
यसैगरी १० किलोमिटर महिला तथा पुरुष दौडका विजेतालाई प्रथम, द्वितीय र तृतीय पुरस्कार क्रमशः ३० हजार, २० हजार, १५ हजार तथा ५ किलोमिटर छात्र-छात्रा दौडतर्फ विजेताले १५ हजार, द्वितीयले १० हजार र तृतीयले ७ हजार पुरस्कार पाउने छन् ।
ह्विलचेयर र दृष्टिविहीन महिला-पुरुष दौडतर्फ प्रथम, द्वितीय र तृतीय हुनेले क्रमशः १० हजार, ७ हजार र ५ हजार पुरस्कार प्राप्त गर्नेछन् ।
यस वर्षदेखि पोखरा म्याराथनले म्याराथनको अन्तर्राष्ट्रिय छाता संस्था एसोसिएसन अफ इन्टरनेसनल म्याराथन एन्ड डिस्टेन्स रेसेस (एम्स)को मान्यता प्राप्त गरेको छ ।
प्रतियोगितालाई सुजल डेरी प्रालिले २०७२ देखि मुख्य प्रायोजन गर्दै आएको छ । प्रतियोगिता सम्पन्न गर्न ९३ लाख रुपैयाँ लाग्ने आयोजक संस्थाले जनाएको छ । म्याराथनका लागि विभिन्न संघसंस्थाले आर्थिक सहयोग गरेका छन् ।
