काठमाडौँ– राष्ट्रपति विद्यादेवी भण्डारीले गत वैशाख ३० मा सम्पन्न स्थानीय तह निर्वाचनमा खर्च विवरण नबुझाउने उम्मेदवारहरूको जरिवाना रकम माफी मिनाहा गरेकी छिन् । 

गत फागुन ४ को मन्त्रिपरिषद्को बैठकले निर्णय गर्दै गरिएको सिफारिसअनुसार नेपालको संविधानको धारा २७६ बमोजिम माफी मिनाहा गरिएको राष्ट्रपतिको कार्यालयले हालै एक विज्ञप्ति जारी गर्दै जनाएको छ । 

फागुन ७ गते , प्रजातन्त्र दिवसको अवसर पारेर राष्ट्रपति विद्यादेवी भण्डारीले उम्मेदवारहरूको जरिवाना माफी गरेको बताइएको छ । 

यसअघि, समयमै निर्वाचन खर्च विवरण नबुझाउने उम्मेदवारहरूलाई निर्वाचन आयोगले जरिवाना तोकेको थियो । 

मुलुकभरमा ७५३ स्थानीय तह छन् । जसमध्ये १ लाखभन्दा बढी उम्मेदवारले खर्च विवरण नबुझाएको आयोगको भनाइ छ ।

उनीहरूका लागि निर्वाचन आयोगले २४ अर्ब ६३ करोड ८८ लाख रूपैयाँ जरिवाना तोकेको थियो। तर, सरकारले अहिले मिनाहा गरिदिएको छ ।