काठमाडौँ– काठमाडौंमा जारी आइसिसी विश्वकप क्रिकेट विश्वकप ‘लिग–टु’अन्तर्गत त्रिकोणात्मक श्रृंखला लगातार ३ खेल जितेको नेपाली राष्ट्रिय टोलीलाई प्रधानमन्त्री पुष्पकमल दाहाल प्रचण्डले बधाई दिएका छन् ।

सामाजिक सञ्जालमार्फत बधाई दिँदै प्रधानमन्त्री प्रचण्डले उत्कृष्ट खेलाडीहरूलाई सरकारको तर्फबाट प्रोत्साहित र पुरस्कृत गरिने विश्वास दिलाएका छन् ।

‘काठमाडौंमा जारी आइसिसी पुरुष क्रिकेट विश्वकप ‘लिग–टु’अन्तर्गत त्रिकोणात्मक श्रृंखलामा उत्कृष्ट प्रर्दशनबाट लगातार तेस्रो जित निकाल्न सफल भएकोमा नेपाली टिमलाई हार्दिक बधाई ज्ञापन गर्दै उत्कृष्ट खेलाडीहरूलाई सरकारको तर्फबाट प्रोत्साहित र पुरस्कृत गरिने विश्वास दिलाउँछु,’ उनले ट्विटरमा लेखेका छन् ।

स्कटल्यान्ड र नामिबियासहितको त्रिकोणात्मक सिरिजमा नेपालले विशाल लक्ष्य पाउनका बाबजुद जित निकाल्दै ३ वटा खेल जितिसकेको छ । अब १ खेल स्कटल्यान्डसँग खेल्न बाँकी छ ।