देशको प्रतिनिधित्व गरेर विदेश जान पाउनुपर्ने माग गर्दै सर्वोच्च जाने तयारीमा सन्दीप
काठमाडौँ– उच्च अदालत पाटनको आदेशविरुद्ध नेपालका राष्ट्रिय क्रिकेटर सन्दीप लामिछाने सर्वोच्च अदालत जाने भएका छन् ।
देशको प्रतिनिधित्व गरेर विदेश जान पाउनुपर्ने र रिहा हुँदा धरौटी रकम धेरै तिर्नु परेकाले त्यो घटानुपर्ने माग गर्दै लामिछाने सर्वोच्च जान लागेको उनका वकिल सरोजकृष्ण घिमिरेले सिएन नेपाललाई जानकारी लिए ।
लामिछानेलाई विदेश जान नपाउनेलगायत विभिन्न शर्त राखेर उच्च अदालतले गत पुस २९ मा रिहा गरेको थियो ।
अहिले काठमाडौँमा आइसिसी क्रिकेट विश्वकप लिग– २ चलिरहेको छ । उनले यसमा उच्च प्रदर्शन गरिरहेका छन् । क्रिकेट समर्थकहरू पनि लामिछानेलाई विदेश लैजानुपर्ने माग रहेको छ ।
लामिछानेमाथि नाबालिग भनिएकी एक किशोरीले बलात्कारको आरोप लगाएकी छिन् । सो मुद्दा काठमाडौँ जिल्ला अदालतमा विचाराधीन छ ।
नेपाली क्रिकेट टोली युएई र पपुवा न्युगिनीविरुद्धक खेल खेल्न आगामी १३ गते दुबई जाँदैछ । यी दुवै टोलीसँगका खेल कम्तीमा एकदिवसीय मान्यता जोगाइराख्न नेपालका लागि महत्वपूर्ण छन् ।
अदालतले विदेश जान रोक लगाइरहेको अवस्था लामिछाने सो टोलीमा नहुने निश्चित छ ।
