काठमाडौँ– प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राष्ट्रपति निर्वाचनमा १२ बुँदे समझदारीका पक्षधर शक्तिहरूलाई एक्कै ठाउँमा उभिन अपिल गरेका छन् ।
प्रधानमन्त्री प्रचण्डले १२ बुँदे समझदारी, विस्तृत शान्ति सम्झौता र संविधान निर्माणका बेला एक ठाउँ उभिएका शक्तिहरूलाई फेरि पनि एकै ठाउँमा उभिन अपिल गरेका हुन् ।
पोखराको लेखनाथमा माओवादी केन्द्र गण्डकी प्रदेश समितिको छैटौँ पूर्ण बैठकमा बोल्दै उनले भने, ‘देश राजनीतिक र आर्थिक रूपले अप्ठ्यारो परिस्थितिमा छ । राजनीतिमा दूषित हावा देखिएको छ । अर्थतन्त्र अप्ठ्यारो ठाउँमा छ । १२ बुँदे समझदारी, विस्तृत शान्ति सम्झौता र संविधान निर्माणका बेला जुन-जुन शक्ति एक ठाउँ उभिएका थिए, फेरि पनि ती शक्तिहरू एक ठाउँ उभिन आवश्यक छ ।’
उनले राष्ट्रपति र उपराष्ट्रपतिमा राष्ट्रिय सहमति होस् भन्ने चाहनाको अन्तर्य पनि यही रहेको स्पष्ट पारे ।
उनले राष्ट्रिय सहमतिका लागि विभिन्न विकल्प भएको पनि उल्लेख गरे । ‘ठुला पार्टी एक ठाउँ उभिन नसक्ने अवस्था छैन । राज्यका मुख्य ठाउँहरूमा समझदारीका साथ अघि बढ्न सकिन्छ । हाम्रा लागि यही मान्छे भन्ने छैन, जहाँ सहमति हुन्छ, त्यहाँबाट अघि बढौँ । तर, ठुला दलहरू एक ठाउँ उभिनुपर्छ भन्ने हाम्रो प्रष्ट मान्यता छ’, प्रधानमन्त्री प्रचण्डले भने ।
उनले आफूहरूले राष्ट्रपतिमा कुनै व्यक्तिको कुरा नगरेको दाबी गर्दै ३ ठुला दल एक ठाउँमा रहनुपर्नेमा जोड दिए ।
प्रचण्डले २ महिना जनताका बीचमा गएर उनीहरूको कुरा सुन्न पार्टीका नेता कार्यकर्तालाई निर्देशन पनि दिए ।
