काठमाडौँ– नेपाली क्रिकेट टोलीका कप्तान रोहित पौडेलले संकटको अवस्थामा उत्कृष्ट खेल प्रदर्शन गरेपछि नेपालले स्कटल्यान्डलाई फेरि पराजित गरेको छ ।
आजको खेलमा नेपालले स्कटल्यान्डलाई २ विकेटले पराजित गरेको हो ।
आजको खेलमा कप्तान रोहित पौडेल नायक रहे । लगातार विकेट गुमाएर संकटमा परेको नेपाली टोलीको तर्फबाट कप्तान पौडेलले जारी आइसिसी पुरुष विश्वकप क्रिकेट लिग २ अन्तर्गत स्कटल्यान्डविरुद्ध ९५ रन प्रहार गरेका हुन् ।
यस्तै, करन केसीले अभिजित ३१ रन बनाए । स्कटल्यान्डले दिएको ११३ रनको लक्ष्य नेपालले ४४.१ ओभरमा ८ विकेटको क्षतिमा पूरा गरेको हो ।
नेपालको ब्याटिङ सुरुआत भने सुखद् रहेन । नेपालले १ रन बनाउँदा नै पहिलो विकेटको रूपमा ओपनर कुशल भुर्तेललाई गुमाएको थियो ।
यस्तै, १९ रन बनाउँदा दोस्रो विकेटको रूपमा आसिफ सेफ आउट भए । पूर्वकप्तान ज्ञानेन्द्र मल्ल पनि क्रिजमा धेरै बेर टिक्न सकेनन् ।
नेपालको स्कोर ३४ रन हुँदा मल्ल पनि आउट भए भने नेपालको कुल स्कोर ६० रन हुँदा अर्का भरपर्दा ब्याट्सम्यान कुशल मल्ल पनि आउट भए । नेपालले ६१ रन बनाउँदा अर्का ब्याट्सम्यान सन्दीप जोरा पनि आउट भएपछि नेपाली टिम दबाबमा परेको थियो ।
यस्तै, नेपालको स्कोर १०३ रन हुँदा दीपेन्द्रसिंह ऐरी पनि आउट भए भने ११४ रन बनाउँदा सोमपाल कामी पनि पेभेलियन फर्के ।
आठौँ विकेटको रुपमा सन्दीप लामिछाने आउट हुँदा नेपालको स्कोर जम्मा १३८ रन मात्रै थियो ।
त्यसपछि करन केसीको उत्कृष्ट साथ पाएका रोहित पौडेलले खेललाई अघि बढाउँदै जितसम्म पुर्याएका हुन् ।
नेपालले टस जितेर फिल्डिङ रोजेको थियो । स्कटल्यान्डको टिम ४६.१ ओभरमा समेटिँदै २१२ रन मात्रै बनाएको थियो ।
स्कटल्यान्डका लागि जर्ज मन्सीले ५० बलमा ६० रन बनाएका थिए । बलिङतर्फ भने नेपालका लागि सन्दीप लामिछानेले १० ओभरमा ४५ रन दिदै ४ विकेट लिए ।
यस्तै बलर करन केसीले ८.१ ओभर बलिङ गर्दा ४२ रन खर्चेर ३ विकेट लिए । ललित राजवंशी र कुशल मल्लको नाममा १-१ विकेट रह्यो ।
