न्युयोर्क– संयुक्त राष्ट्रसंघका महासचिव एन्टोनियो गुटेरेसले बुधबार युक्रेनमा रुसको आक्रमणको निन्दा गर्दै यो ‘हाम्रो सामूहिक विवेकको अपमान’ भएको बताएका छन् ।

रुसले युक्रेन आक्रमण गरेको एक वर्ष पुग्न दुई दिनअघि एघारौं आपतकालीन विशेष सत्रलाई सम्बोधन गर्दै महासचिव गुटेरेसले भने, ‘जब तपाईँले युक्रेनमा रुसको आक्रमणबारे कुरा गर्नुहुन्छ भने युक्रेनका जनता र अन्तरराष्ट्रिय समुदायका लागि यो लाजमर्दो विषय हो ।’ 

यो संयुक्त राष्ट्रसंघको बडापत्र र अन्तरराष्ट्रिय कानुनको उल्लंघन भएको उनले बताए । ‘यसले नाटकीयरूपमा मानवअधिकारको हनन निम्त्याइरहेको छ र यसको प्रभाव युक्रेनभन्दा धेरै परसम्म महसुस भइरहेको छ,’ उनले थपे ।

रुस–युक्रेन युद्ध गत फेब्रुअरी २४ मा सुरु भएको थियो र हालसम्म जारी छ । युक्रेनमा द्वन्द्व बढ्दै गएपछि महासभाले किभले समर्थन गरेको प्रस्तावमाथि बहस गर्न थालेको हो ।  विशेष सत्रलाई सम्बोधन गर्दै राष्ट्रसंघ प्रमुखले पनि भने, ‘मैले पहिलो दिनदेखि भनेको कुरा के हो भने यस कदमले विश्च समुदायलाई चुनौती थपेको छ ।’

राष्ट्रसंघका सबै सदस्यहरूले आफ्नो अन्तरराष्ट्रिय सम्बन्धमा कुनै पनि राज्यको क्षेत्रीय अखण्डता वा राजनीतिक स्वतन्त्रताविरुद्ध वा संयुक्त राष्ट्रका उद्देश्यहरूसँग असंगत हुने गरी धम्की वा बल प्रयोगबाट टाढा रहनुपर्ने महासचिवको धारणा छ । उनले युक्रेनका चार क्षेत्रलाई गैरकानुनी रूपमा गाभिएकामा  पनि आपत्ति जनाएका छन् ।  

यसअघि पोल्यान्डमा बुधबार अमेरिकी राष्ट्रपति जो बाइडेनले रुसी राष्ट्रपति भ्लादिमिर पुटिनले आफ्नो युद्धघोष गर्दा ‘ठूलो गल्ती’ गरेको बताएका थिए ।