दिक्तेल– कार्यसम्पादन सूचक मूल्यांकनमा दिक्तेल रुपाकोट मझुवागढी नगरपालिकाले सबैभन्दा बढी अंक प्राप्त गरेको छ । जिल्लाका १० स्थानीय तहमध्ये उक्त दिक्तेल रुपाकोट मझुवागढी नगरपालिकाले ६६.७८ अंक ल्याएको राष्ट्रिय प्राकृतिक स्रोत तथा वित्त आयोगको प्रतिवेदनमा उल्लेख छ ।
आयोगका अनुसार दिप्रुङ चुइचुम्मा गाउँपालिकाले ५९.८४ अंक, ऐसेलुखर्क गाउँपालिकाले ५७.७८ अंक, हलेसी तुवाचुङ नगरपालिकाले ५५.३० अंक, खोटेहाङ गाउँपालिकाले ५१.७० अंक प्राप्त गरेको छ । यस्तै साकेला गाउँपालिकाले ५१.१३ अंक, रावाबेँसी गाउँपालिकाले ४९.०६ अंक, केपिलासगढी गाउँपालिकले ४७.५९ अंक र बराहपोखरी गाउँपालिकाले ४६.४८ अंक पाएको आयोगको प्रतिवेदनमा उल्लेख छ ।
जन्तेढुंगा गाउँपालिकाले जिल्लाका १० स्थानीय तहमध्ये सबैभन्दा कम अंक ल्याएको प्रतिवेदनमा उल्लेख छ । राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन सूचक मूल्यांकन प्रतिवेदनअनुसार जन्तेढंगा गाउँपालिकाले सबैभन्दा कम ४४.०८ अंकमात्र ल्याएको हो ।
प्रदेश तथा स्थानीय सरकारको वित्तीय समानीकरण अनुदान सिफारिस गर्न निर्धारण गरिएको कार्यसम्पादन सूचकको मूल्यांकन प्रतिवेदनअनुसार असार १० गतेभित्र राजस्व र व्यायको अनुमान गाउँसभा-नगरसभामा गरे÷नगरेको, असार मसान्तभित्र राजस्व र व्यायको अनुमान पारित गरे÷नगरेको, आर्थिक वर्ष २०७७-७८ मा कायम भएको बेरुजु रकम, स्थानीय सञ्चित कोष व्यवस्थापन प्रणाली (सूत्र) प्रयोग गरे÷नगरेको, आवधिक योजना तर्जुमा गरे÷नगरेकोलगायतका सूचकको आधारमा कार्यसम्पादन सूचक मूल्यांकन गरिएको जनाइएको छ ।
घरजग्गा रजिष्ट्रेशन शुल्क, मनोरञ्जन कर तथा विज्ञापन करवापत उठेको रकमध्ये प्रदेश सरकारलाई दिनुपर्ने ४० प्रतिशत रकम मासिकरूपमा प्रदेश सञ्चित कोषमा जम्मा गरे-नगरेको, आर्थिक वर्ष २०८०-८१ को आयव्याय प्रक्षेपण गरिएको तथ्यांकसहितको विवरण २०७९ पुस सान्तभित्र अर्थ मन्त्रालयमा पेस गरेन-गरेको, आर्थिक वर्ष २०७९-८० को बजेट कार्यान्वयनको वार्षिक समीक्षा गरी तत्सम्बन्धी विवरण २०७९ कात्तिक मसान्तभित्र सार्वजनिक गरे-नगरेको, चारपटक गर्भजाँच गर्ने महिलाको संख्यालगायतका आधारमा कार्यसम्पादन मूल्यांकन गरिएको आयोगले जनाएको छ ।
