काठमाडौँ– तत्कालीन सत्ता गठबन्धन दलहरूको बैठक सकिएको छ ।
प्रधानमन्त्री निवास बालुवाटारमा शुक्रबार बिहान बसेको बैठक सकिएर नेताहरू बाहिरिएका छन् ।
राष्ट्रपति उम्मेदवारबारे निर्णय गर्न बैठक बसेको हो । बैठकमा के सहमति भयो, खुल्न सकेको छैन ।
बैठकमा प्रधानमन्त्री तथा माओवादी अध्यक्ष पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष माधवकुमार नेपाल र जसपाका अध्यक्ष उपेन्द्र यादव सहभागी थिए ।
कांग्रेस नेताहरू रामचन्द्र पौडेल, पूर्णबहादुर खड्का, गगन थापा, कृष्णप्रसाद सिटौला र माओवादी केन्द्रका नेता नारायणकाजी श्रेष्ठ पनि सहभागी थिए ।
पुरानै गठबन्धन ब्युँताउने तयारीमा दलहरू छन् । प्रधानमन्त्री दाहालले आजै एमाले अध्यक्ष केपी शर्मा ओलीसँग पनि निर्णायक वार्ता गर्दै छन् ।
सत्ता गठबन्धनको एमालेले पनि राष्ट्रपतिमा दाबी गरिरहेको छ । त्यस्तै पुरानो गठबन्धनभित्र पनि एमालेबाहेकको राष्ट्रपति बनाउनुपर्नेमा छलफल तीव्र बनाइएको छ ।
पुरानो गठबन्धनका दलहरू कांग्रेस र एकीकृत समाजवादीले राष्ट्रपतिका लागि दाबी गरेका छन् ।
