लनजुङ–लमजुङमा १६ फागुनदेखि चारवटा पालिकामा दोस्रो बुस्टर खोप सञ्चालन गरिने भएको छ ।
स्वास्थ्य कार्यालय लमजुङले कोभिडविरुद्धको बुस्टर डोजका रूपमा चौथो मात्रा खोप अभियान सञ्चालन गर्न लागेको हो ।
तेस्रो मात्राको खोप लगाएको ६ महिना पुगेका ५५ वर्ष माथिका नागरिक, स्वास्थ्यकर्मी, १२ वर्ष माथिका दीर्घरोगी, गर्भवती, रोगप्रतिरोधक क्षमता कम भएकालाई दोस्रो बुस्टरका रुपमा चौथो मात्राको खोप दिइनेछ ।
पहिलो चरणमा बेंसीसहर र सुन्दरबजार नगरपालिका, दोर्दी र मस्र्याङ्दी गाउँपालिकामा खोप अभियान सञ्चालन गरिने स्वास्थ्य कार्यालय लमजुङका प्रमुख अमर दवाडीले जानकारी दिए । यी पालिकामा खोप अभियान सञ्चालन गर्नका लागि प्रदेश स्वास्थ्य कार्यालयबाट १२ हजार मात्रा वाई भायोलेन्ट खोप आइसेको छ । ४ वटा पालिकाका सबै वडामा रहेका स्वास्थ्य संस्थाबाट खोप सञ्चालन गरिने दवाडीले बताए ।
दोस्रो बुस्टरका रुपमा फाइजर बायोएनटेक खोप बेंसीसहर बजारमा १ हजार ९१ जनालाई लगाइ सकिएको स्वास्थ्य कार्यालयले जनाएकोछ । जिल्लामा पहिलो बुस्टर मात्रा ९० हजार ८२३ जनाले लगाएका छन् । पहिलो खोप मात्रा १ लाख २३ हजार ३०३ र दोस्रो खोप मात्रा १ लाख १९ हजार ८६७ जनाले लगाएका थिए । ३ चरणको खोप खोप लगाएपछि बुस्टर भनिन्छ ।
