काठमाडौँ –पेरिस ओलम्पिक–२०२४ का लागि हुने महिला ओलम्पिक फुटबल एसियन छनोटको प्रारम्भिक चरणका खेलहरू नेपालमै हुने भएको छ ।
छनोटको प्रारम्भिक चरणको समूह ‘सी’ मा रहेको नेपालसँगै भियतनाम, प्यालेस्टाइन र अफगानिस्तान छन् ।
यसअघि समूह ‘सी’ का खेलहरू प्यालेस्टाइनमा हुने तय भएको थियो । तर, प्यालेस्टाइनले आयोजकबाट आफ्नो नाम फिर्ता लिएपछि एएफसीले यो समूहको छनोट खेलहरू आयोजनाको जिम्मा नेपाललाई सुम्पिएको हो ।
छनोटको पहिलो चरणका खेलहरू चैत २० गतेदेखि २८ गतेसम्म हुनेछन् । समूहको विजेताले छनोटको दोस्रो चरणमा स्थान बनाउनेछ । छनोटको दोस्रो चरणमा उत्तर कोरिया, दक्षिण कोरिया, जापान, चीन र अस्ट्रेलियाले यसअघि नै स्थान बनाइसकेका छन् ।
दोस्रो चरणमा प्रवेश गर्ने टिमलाई ३ समूहमा विभाजन गरिनेछ । दोस्रो चरणबाट पनि समूह विजेता र एक उत्कृष्ट समूह उप–विजेता तेस्रो चरणमा प्रवेश गर्नेछन् । तेस्रो चरणबाट शीर्ष २ टिमले पेरिस ओलम्पिकमा स्थान बनाउनेछन् ।
ओलम्पिक छनोटको तयारीका लागि यसअघि नेपालले भारतसँग २ मैत्रीपूर्ण फुटबल खेलेको थियो । भारतविरुद्धको पहिलो खेलमा नेपालले २–२ को बराबरी खेल्दा दोस्रो खेलमा घरेलु टिमलाई गोलरहित बराबरीमा रोकेको थियो ।
