काठमाडौँ –अभिनेत्री निशा अधिकारी शोभित बस्नेतको फिल्ममा नयाँ फिल्म ‘जय हो’मा अनुबन्ध भएकी छन् । अधिकारी पछिल्लो समय फिल्ममा देखिएकी छैनन् ।
गत साउनमा रिलिज ‘म’मा देखिएकी निशा त्यसयता फिल्ममा देखिएकी छैनन् । आमा भएपछि फिल्म उद्योगमा पातलिएको निशाको उपस्थिति अब भने बाक्लिने देखिएको छ । उनी भर्खरै फिल्म ‘आँखा’को छायांकन सकेर बसेकी छन् ।
टेक पौरखी राईको निर्देशनमा बन्ने फिल्म ‘जय हो’मा निशासँगै केकी अधिकारी, सलोन बस्नेत, अर्पण थापा, माओत्से गुरुङलगायतका कलाकारले अभिनय गर्नेछन् ।
फागुन २५ देखि फ्लोरमा जाने फिल्मको अधिकांश भाग मुस्ताङमा छायांकन हुनेछ । फिल्मको केहि दृश्य पोखरामा खिचिने निर्माण टिमले जनाएको छ । फिल्ममा सुरेश न्यौपानेको कथा, सौरभ लामाको छायांकन र शम्भुजित बाँस्कोटाको संगीत रहनेछ ।
छायांकन सुरु हुनुअगावै फिल्मको रिलिज मिति तोकिएको छ । यो फिल्मलाई आगामी वर्ष तीजमा रिलिज गर्ने निर्माण टिमको तयारी छ । सलोन सलिना फिल्मस्को ब्यानरमा निर्माण हुने फिल्ममा राज के अधिकारी र सुरज सरकारको लगानी छ ।
