तनहुँ– नेपाल रेडक्रस सोसाइटी तनहुँ शाखाद्वारा अपांगता भएका व्यक्तिलाई दमौलीमा लेखा व्यवस्थापन तालिम प्रदान गरिएको छ ।
उनीहरूलाई आत्मनिर्भर बनाउन टेवा पुर्याउने उद्देश्यले सो तालिम प्रदान गरिएको हो ।
शाखा सभापति प्राडा कृष्णप्रसाद गौतमले अपांगता स्वालम्बन समूहको बचत परिचालन गर्ने, हिसाब राम्रोसँग राख्न सिकाउने, आयआर्जनको रकमलाई सही तरिकाबाट व्यवस्थापन गराउने उद्देश्यले तालिम प्रदान गरिएको बताए ।
उक्त शाखाका मन्त्री सूर्यचन्द्र हड्खलेले तालिममा ऋषिङ गाउँपालिकाका ८ वटै वडामा रहेका अपांगता स्वालम्बन समूहका अध्यक्ष, कोषाध्यक्ष, रेडक्रस उपशाखाका स्वयंसेवक, अपांगता क्षेत्रमा काम गर्ने संस्थाका प्रतिनिधिसहित २५ जनाको सहभागिता रहेको जानकारी दिए ।
व्यास नगरपालिकाका प्रमुख बैकुण्ठ न्यौपानेले ‘जहाँ दुःख त्यहाँ रेडक्रस’ भन्ने भावानाअनुरूप नै काम गरिहेको उल्लेख गर्दै यस्ता तालिमले अपांगता भएका व्यक्तिलाई आत्मनिर्भर बन्न टेवा पुग्ने विश्वास व्यक्त गरे ।
प्रशिक्षार्थीहरूलाई जगतबन्धु वाग्लेले प्रशिक्षण दिएका थिए ।
