काठमाडौँ –क्रिकेटर सन्दीप लामिछानेको सुनुवाइ सकिएको छ ।
सन्दीपको तर्फबाट वरिष्ठ अधिवक्ता रमन श्रेष्ठ, अधिवक्ता सरोजकृष्ण घिमिरेका साथै सरकारको तर्फबाट सहन्यायधिवक्ता सञ्जीवराज रेग्मीसहितले बहस गरेसँगै सुनुवाइ सकिएको हो । यससँगै सर्वोच्चले आजै आदेश सुनाउने तयारी गरेको छ ।
उच्च अदालतको आदेश विरुद्ध सन्दीप सर्वोच्च अदालत गएका थिए । यसअघि आइतबार न्यायाधीशद्वय सपना प्रधान मल्ल र कुमार चुडालको संयुक्त इजलासमा बहस नसकिएपछि मुद्दा आजका लागि हेर्दाहेर्दैमा राखिएको थियो ।
नाबालिका बलात्कार अभियोगमा थुनामा रहेका सन्दीपलाई उच्च अदालतले धरौटीमा रिहा गरेको थियो । उनलाई धरौटीमा रिहा गर्दा उच्च अदालतले विदेश जान नपाउने, काठमाडौं छाडेर बाहिर जाँदा अनुमति लिनुपर्ने लगायतका शर्तहरू राखेको थियो । धरौटी रकम बढी भएको, विदेश खेल्न जान पाउनुपर्ने लगायतका माग राख्दै सन्दीप सर्वोच्च पुगेका हुन् ।
