काठमाडौं– नेपाली कांग्रेसका महामन्त्री गगन थापाले पुस १० मा भएको गल्तीलाई सच्याएर नेपाली कांग्रेसले घाम लागेको बेलामा नेकपा (एमाले)सँगको गठबन्धन भत्काएको बताएका छन् । 

मंगलबार काठमाडौंमा आयोजित एक कार्यक्रमलाई सम्बोधन गर्दैै पुस १० गते दुर्घटना भएको र त्यसलाई अहिले सच्याउने काम भएको थापाले बताए । 

‘उज्यालोमा, घाम लागेको बेलामा गठबन्धन भत्काउने प्रयास गरेको हो । कामना गरेको हो । यसका लुकाउनु पर्ने कुरै छैन । यसमा अपराधबोध महसुस गर्नुपर्ने अवस्था पनि छैन । किनकि, जे बनेको थियो त्यो अप्राकृतिक थियो, अस्वभाविक थियो । अवाञ्छित थियो । त्यसैले हामीले त्यसलाई ठिक ट्रयाकमा हिडाउनै पर्ने थियो,’ उनले भने । 

नेकपा (माओवादी केन्द्र)का अध्यक्ष पुष्पकमल दाहाल प्रचण्डले प्रधानमन्त्री बन्ने मात्रै लोभ नराखेको भन्दै थापाले प्रचण्डको प्रशंसा पनि गर्न भ्याए । 

‘यो पनि बुझ्न आवश्यक छ कि माओवादी केन्द्रका अध्यक्षलाई प्रधानमन्त्री मात्रै बन्ने लोभ, लासला र प्रधानमन्त्री नै सबैकुरा हो भन्ने कुरा आजको दिनमा लागेको थियो भने पुस १० मा बनेको गठबन्धनलाई समातेर बसिरहनुभएको भए अझ बढी समय र सहजताका साथ प्रधानमन्त्री हुनसक्नुहुन्थ्यो,’ उनले भने । 

कार्यक्रममा थापाले नेकपा (एकीकृत समाजवादी)का अध्यक्ष माधव नेपालको पनि प्रशंसा गरेका थिए । 

‘एकीकृत समाजवादीका अध्यक्ष माधव नेपालले चाहेको भए राष्ट्रपति हुने अफर र अवसर आएको थियो । उहाँले चाहनुभएको भए एमालेकै समर्थनमा प्रधानमन्त्री बन्न सक्नुहुन्थ्यो । जानु भएन नि त राष्ट्रपति र प्रधानमन्त्री बन्नलाई’, उनले भने, ‘नेताहरुसँग गुनासा छन् । प्रश्नहरू पनि छन् । तर, जहाँ सही गरेका छन् त्यसबेला सही गरेको पनि भन्नसक्नुपर्छ ।’ 

पुस १० मा गल्ती भएको बोध सबैलाई भएपछि अहिलेको ८ दलीय गठबन्धन बनेको थापाले बताए । 

संसद्को पहिलो बैठकमा एमालेका अध्यक्षले पहिलो आफूले गरेको संसद् विघटन सही थियो र त्यसरी संसद् विघटन पटक–पटक हुन्छ भनेपछि पुस १० गतेको गठबन्धन टिक्न हुँदैन भन्ने राजनीति सोच सबैलाई भएको थापाले बताए । 

अब केन्द्र र प्रदेश सबै ठाउँमा ८ दलीय गठबन्धनको सरकार बन्ने उनले दाबी गरे । 

केन्द्र, प्रदेश र स्थानीय सरकारमा कांग्रेसको उपस्थिति हुने भएकाले नतिजा आउने गरी काम गर्नुपर्ने चुनौति रहेको थापाको स्वीकारोक्ति थियो ।