भारतबाट इन्धनको मूल्य घटेर आएपनि नेपालमा नघट्ने

काठमाडौँ– भारतबाट खाना पकाउने ग्याँसबाहेक अन्य सबै प्रकारका इन्धनको मूल्य घटेर आएपनि नेपाल आयल निगमले इन्धनको मूल्य यथावत् राख्ने निर्णय गरेको छ । 

निगमले आज एक विज्ञप्ती जारी गर्दै  भारतबाट इन्धनको मूल्य घटेर आएपनि सरकारसहित भारतीय आयल कर्पोरेसन (आईओसी)लाई १६ अर्ब रकम तिर्न बाँकी रहेकोले हाललाई इन्धनको उपभोक्ता मूल्य यथावत् राख्ने जनाएको छ ।

‘आम उपभोक्ताको हितलाई मध्यनजर गरी हाललाई पेट्रोलियम पदार्थको खुद्रा बिक्री मूल्य यथावत् राखिएको छ,’ विज्ञप्ती भनिएको छ ।

आईओसीले बुधबार पठाएको इन्धनको नयाँ सूची अनुसार खाना पकाउने ग्याँसबाहेक अन्य सबै प्रकारका इन्धनको मूल्य घटेर आएको निगमले जनाएको छ ।

नयाँ मूल्यअनुसार डिजलमा लागत ५ रुपैयाँ ५ पैसाले सस्तो भएको छ । यस्तै पेट्रोलमा १ रुपैयाँ २१ पैसा लागत घटेको छ भने मट्टीतेलमा ३ रुपैयाँ ४० पैसाले लागत घटेको छ ।

त्यस्तै हवाई इन्धनमा ७ रुपैयाँ ३ पैसाले लागत घटेको निगमले जनाएको छ ।