काठमाडौँ– जनताको जलविद्युत् कार्यक्रमअन्तर्गतको ९९.५ मेगावाटको तामोकोसी पाँचौँ जलविद्युत् आयोजना निर्माणको ठेक्का चिनियाँ कम्पनी सिनो हाइड्रो कर्पोरेसनले पाएको छ ।
गत फागुन १६ गते खोलिएको आर्थिक प्रस्तावमा कम कबोल गर्ने उक्त कम्पनीले निर्माणको ठेक्का पाएको हो ।
नेपाल विद्युत् प्राधिकरणले बनाउने उक्त आयोजना निर्माणका लागि दुइटा चिनियाँ कम्पनी सर्ट लिस्टमा थिए । चाइना गेजुवा ग्रुप कर्पोरेसन लिमिटेड र सिनो हाइड्रो कर्पोरेसनले आयोजना निर्माणका लागि प्रस्ताव पेस गरेका थिए ।
प्राविधिक र आर्थिक प्रस्ताव मूल्यांकनका आधारमा सिनो हाइड्रो कर्पोरेसनले आवेदन पेस गरेको थियो ।
दोलखामा निर्माण हुन लागेको उक्त आयोजना ४५६ मेगावाटको माथिल्लो तामाकोसीको क्यासकेड आयोजना हो । तामाकोसी नदीमा बाँध निर्माण नगरी माथिल्लो तामाकोसीको विद्युत् गृहबाट आएको टेलरेसको पानीलाई सीधै ८ किलोमिटर लामो सुरुङमा हालेर विद्युत् उत्पादन गरिनेछ ।
सुरीटारमा भूमिगत विद्युत् गृहमार्फत विद्युत् उत्पादन गरिनेछ । आयोजनाबाट उत्पादित विद्युत् २२० केभीको प्रसारण लाइनमार्फत २ किलामिटर दुरीमा रहेको गोंगर–खिम्ती प्रसारण लाइनमा जोड्नेछ ।
१ वर्षपछि निर्माण सुरु गर्ने गरी आयोजनाको पूर्वतयारी अघि बढाइएको आयोजना प्रमुख हेमन्त भट्टले बताए ।
उनका अनुसार कुल १८ अर्ब रुपैयाँ लगानी अनुमान गरिएको आयोजनामा विद्युत् प्राधिकरणसहित कर्मचारी सञ्चय कोष र सर्वसाधारणलाई सेयर बिक्री गरी पुँजी जुटाइने छ । आयोजना ५ वर्षभित्र सम्पन्न गर्ने लक्ष्य रहेको उनको भनाइ छ ।
