काठमाडौँ –नेपाली कांग्रेसका पूर्वमहामन्त्री डा. शशांक कोइरालाले माओवादी केन्द्रका अध्यक्ष पुष्पकमल दाहाल ‘प्रचण्ड’ पछि नेकपा (एकीकृत समाजवादी)का अध्यक्ष माधवकुमार नेपाल प्रधानमन्त्री बन्ने दाबी गरेका छन् ।
नेता कोइरालाले प्रचण्ड २ वर्ष प्रधानमन्त्री रहने र त्यसपछि १ वर्ष अध्यक्ष नेपाल प्रधानमन्त्री बन्ने आठ दलबीच समझदारी भएको दाबी गरे ।
काठमाडौंमा बिहीबार आयोजित अभिमुखीकरण कार्यक्रममा उनले ३ वर्ष पछि पार्टी सभापति शेरबहादुर देउवाको नेतृत्वमा चुनावी सरकार बन्ने पनि दाबी गरे ।
‘अबको २ वर्ष पछि प्रधानमन्त्री फेरिन्छन् । १ वर्ष माधवकुमार नेपाल प्रधानमन्त्री बन्नुहुनेछ’, कोइरालाले भने, ‘चुनावका बेला देउवा प्रधानमन्त्री बन्नुहुनेछ ।’ 
उनले कांग्रेसको ध्यान गठबन्धनमा विश्वास कायम गर्नेमा केन्द्रित रहेको भन्दै बीचमा सरकार तलमाथि नहुने बताए । ‘गठबन्धनमा विश्वास नचुडियोस् भन्नेमा हाम्रो ध्यान केन्द्रित छ । राष्ट्रपति निर्वाचनलाई राष्ट्रिय सहमति नभनौँ, दलीय सहमति भनौँ’ उनले भने ।