जाजरकोट –जाजरकोटको शिवालय गाउँपालिका–२ नेपामा उत्पादन गरिएका कृषिजन्य वस्तु उत्पादन गरी बाहिर जिल्ला पठाउनका लागि सडकको पहुँच विस्तार गर्न लागिएको छ ।
पालिकाको प्रशासकीय केन्द्र सीमाबाट तरकारी उत्पादन भइरहेको नेपासम्म सडक जोड्नका लागि काम जारी रहेको निमित्त प्रमुख प्रशासकीय अधिकृत दलबहादुर बाँठाले जानकारी दिए । पालिका र कृषि क्षेत्र विकास कार्यक्रमको संयुक्त रूपमा २ करोड २० लाख रुपैयाको लागतमा सडक निर्माण कार्य जारी छ ।
सडकको पहुँच नहुँदा नेपामा उत्पादन भएको तरकारी बाली खेर गएर कृषक मर्कामा परेको भन्दै सडकको पहुँच विस्तार गर्न लागिएको अधिकृत बाँठाले बताए । पालिकाका अन्य ठाउँमा समेत उत्पादन भएका कृषिजन्य वस्तु निर्यात गर्न पालिकाले काम थालेको गाउँपालिकाका उपाध्यक्ष गीता शाहीले बताइन् ।
असार मसान्तसम्म सडक निर्माण कार्य पूरा हुने उपाध्यक्ष शाहीले बताइन् । आर्थिक रुपमा बलियो बनाइ गाउँपालिकाको कृषि क्षेत्रलाई अत्यधिक रुपमा उन्नत बनाउन काम भइरहेको बताइएको छ । गाउँपालिकाको –३ को घोडेछाल, वडा ५ को काउला, वडा ७ को भिउसमा दात्ते ओखरको पकेट क्षेत्र बनाएर काम भइरहेको कृषि शाखाका प्रमुख विश्वमित्र शर्माले जानकारी दिए ।
त्यस्तै गाउँपालिकाको वडा १ को सिस्ने, वडा ५ को मन्देराटोल र वडा ८ को लिसपानीमा भटमासको पकेट क्षेत्र बनाइ भटमास उत्पादनलाई जोड दिइएको छ । यहाँ उत्पादित भटमासको बजारीकरणको काम समेत पालिकाले गरेको उनले बताए । केही वर्षअघि बाहिरी जिल्लाबाट बीउ आयात गरेर मकै रोप्ने यहाँका कृषकलाई अहिले ३ वर्षदेखि कृषि शाखाकै पहलमा गाउँपालिकाको वडा ३ स्थित सीमामा मकैको मूल बीउ उत्पादन गरी मूल बीउबाट उन्नत बीउ उत्पादनको काम सुरु गरिएको छ ।
यहाँ उत्पादित उन्तत बीउ बाहिरी जिल्लाबाट माग आएपछि बिक्रीसमेत गर्न सुरु भएको छ । मौसमी र बेमौसमी तरकारी बाली उत्पादन गर्न गाउँपालिकाको वडा २ मा लगानी गर्नुका साथै लगानीअनुसारको प्रतिफलसमेत आएको उनको भनाइ छ । शिवालय–३ घोडेछालमा यस वर्ष आलु उत्पादनका लागि शत प्रतिशत अनुदानमा बीउ वितरण गरिएको छ ।
त्यस्तै वडा ७ को जुङ्गा थापाचौरमा कन्ये च्याउ उत्पादन समेत सुरु गरिएको छ । गाउँपालिका भरी खाद्यान्न उत्पादनका हिसाबले राम्रो मानिएको ठाउँमा कृषक समूहको मागमा आधारित हाते ट्याक्टर वितरण समेत गरिएको छ । त्यस्तै कृषि शाखाकै पहलमा बेमौसमी तरकारी बालीको बीउसमेत वितरण हुँदै आएको छ ।
