काठमाडौं– एमाले अध्यक्ष केपी शर्मा ओलीले संसद विघटन ठिक भन्दै फेरि विघटन हुनसक्ने आशयको अभिव्यक्ति दिएपछि पुरानो गठबन्धन विताउनुपर्ने बारे सोचेको माओवादी केन्द्रका अध्यक्ष एवं प्रधानमन्त्री प्रचण्डले बताएका छन् । 

आठ दलीय गठबन्धनमा आवद्ध दलका सांसदहरूको संयुक्त भेलालाई बिहीबार काठमाडौंमा सम्बोधन गर्दै प्रचण्डले संसदमा विश्वासको मत लिने दिन नै ओलीको अभिव्यक्तिले आफुलाई झस्काएको बताएका हुन् । 

प्रधानमन्त्रीले पुस २६ मा संसदबाट विश्वासको मत लिएका थिए । सोही दिन ओलीले संसदमा सम्बोधन गर्दै आफूले गरेको संसद विघटन ठिक भएको र त्यो आगामी दिनमा पनि दोहोरिन सक्ने आशयको अभिव्यक्ति दिएका थिए । 

‘पुस २६ गतेको संसदमा केपीजीले हिजो संसद विघटन गर्नु ठीक थियो भन्नुभयो । हामी संसद विघटनको विपक्षमा थियौं । हामी आफैंले त्यत्रो संघर्ष गरेर संसद फिर्ता ल्याएका थियौं । तर, उहा“ले ठीक गरेका थियौँ भनेपछि हामी सोच्न बाध्य भयौँ’, प्रचण्डले भने ।

आफ्ना लागि प्रधानमन्त्री पद भन्दा संविधान र लोकतन्त्रको रक्षा ठूलो कुरा भएको दावी पनि प्रचण्डले गरे ।

कांग्रेसको उम्मेदवारलाई राष्ट्रपतिमा सघाएर राष्ट्रिय सहमतिको वातावरण बनाऔ भन्दा ओलीले नै नमानेको पनि प्रचण्डले बताएका छन् ।