काठमाडौँ– नेपाली चलचित्र क्षेत्रका बहुचर्चित अभिनेता दयाहाङ राई संयुक्त राज्य इमिरेट्स् (युएई) जाने भएका छन ।
अभिनेता राई शुक्रबार ईसेवा मनि ट्रान्सफरको ‘मेरो डिजिटल देश’ अभियान अन्तर्गत इमिरेट्स एक्सचेन्ज र ईसेवा मनि ट्रान्सफरको निम्तोमा युएई जान लागेका हुन् । उनी इसेवा मनि ट्रान्सफरका ब्राण्ड हिरो समेत रहेका छन् ।
राई युएईको शारजाहस्थित इमिरेट्स एक्सचेन्जका शाखामा बेलुका ६ बजेदेखि ७ बजेसम्म रहनेछन् । त्यस्तै, शनिवार सोनापुर शाखामा बिहानको ११ बजेदेखि १२ बजेसम्म, जेबेल अली शाखामा साँझको ५ बजेदेखि ६ बजेसम्म र ग्रान्ड हाइपर शाखामा बेलुकाको साढे ६ बजेदेखि साढे ७ बजेसम्म रहनेछन् ।
त्यसैगरी आगामी आइतबारका दिन अबुधावीस्थित मफराक सेन्टरमा दिउँसो २ बजेदेखि साढे ३ बजेसम्म बस्नेछन् ।
इसेवा मनी ट्रान्सफरले दिएको जानकारी अनुसार अभिनेता राइले नेपाली सेवाग्राही तथा इमिरेट्स इन्टरनेसनल एक्सचेन्जका नेपाली कर्मचारीहरुसँग भेटघाट तथा अन्तरक्रिया गर्नेछन् ।
राईले यस अभियानमा विदेशमा श्रम गरेर देशको अर्थतन्त्रमा महत्वपूर्ण योगदान दिइरहेका नेपालीहरु भेट्न आफू निकै उत्साहित रहेको बताएका छन् । उनले नेपालीहरु बसोबास गर्ने स्थानमै गएर डिजिटल रेमिट्यान्स सम्बन्धी अन्तरक्रिया गर्ने कम्पनीले जनाएको छ ।
इसेवा मनि ट्रान्सफरको ‘मेरो डिजिटल देश’ अभियान अन्र्तगत विश्वभरबाट नेपालमा बैंक खाता वा वालेटमार्फत रेमिट्यान्स पठाउने सेवा सञ्चालन गर्दै आइरहेको छ ।
यस अभियानमा सहभागी नेपालीहरुलाई इसेवाले विभिन्न उपहार समेत दिइरहेको छ ।
‘मेरो डिजिटल देश’ योजना अन्तर्गत डिजिटल माध्यमबाट रेमिट्यान्स पठाउने भाग्यशाली एक जना काठमाडौँमा घर समेत दिने योजना इसेवाले अघि सारेको छ ।
इमिरेट्स एक्सचेन्ज सन् १९८० देखि आधुनिक प्रविधिका डिजिटल भुक्तानी सेवाहरु प्रदान गर्दै आइरहेको छ । कम्पनिले युएइमा ३५ भन्दा बढी शाखाहरुबाट नेपाली सेवाग्राहीलाई आफ्नो अमुल्य सेवा प्रदान गर्दे आइरहेको छ ।
