काठमाडौँ– पशुपति क्षेत्रमा अतिक्रमण गरी निर्माण गरिएका संरचना हटाउन काठमाडौँ महानगरपालिकाले २४ घन्टाको अल्टिमेटम दिएको छ ।
महानगरपालिकाको टोलीले पशुपति क्षेत्रका अतिक्रमित संरचनाको निरीक्षण गरेपछि ती संरचना हटाउन निर्देशनसहितको अल्टिमेटम दिएको जानकारी पाएको पशुपति क्षेत्र विकास कोषका प्रवक्ता रेवतीरमण अधिकारीले बताए ।
उनले भने, ‘हामीलाई औपचारिक रूपमा महानगरले जानकारी दिएको छैन । तर अतिक्रमण गरिएका संरचना हटाउन २४ घन्टाको अल्टिमेटम दिएको छ भन्ने सुन्नमा आएको छ ।’
पशुपति क्षेत्र विकास कोषबाट १ रोपनी जग्गा वार्षिक ५० हजार रूपैयाँ भाडामा लिएर १० रोपनी जग्गा गौशाला धर्मशालाका नाममा सञ्चालन भइरहेको पाइएको महानगरले जनाएको छ ।
यसैगरी पशुपति क्षेत्रमा २० वटाभन्दा धेरै सटर बिनादर्ता सञ्चालन भइरहेको महानगरको निरीक्षणमा भेटिएको छ ।
धर्मशालाले नक्सा पासबिना नै संरचना निर्माण गरेको पाइएकाले त्यस्ता संरचना हटाइने महानगरले जनाएको छ ।
बुधबार कोषले महानगरलाई पत्र लेख्दै पशुपति क्षेत्र विकास कोष र महानगर दुवैलाई थाहा नदिई अवैध रूपमा निर्माण भएका संरचना, सम्झौताविपरीतका व्यवसाय, अतिक्रमित संरचना हटाउन अनुरोध गरेको थियो ।
सोहीअनुसार महानगरले बिहीबार अनुगमन गर्दै २४ घन्टाभित्र त्यस्ता संरचना हटाउन निर्देशन दिएको हो ।
