काठमाडौँ –‘ए’ डिभिजन लिगका लागि संकटा क्लबलाई यु क्यान ब्रान्डको चाइना ट्रेड लिंक प्रालिको लिनिङले जर्सीसहित खेल सामग्री प्रायोजन गरेको छ ।
क्लबले शनिबार पत्रकार सम्मेलन गर्दै लिनिङसँग सम्झौता गरेको हो । सम्झौतापत्रमा क्लबका अध्यक्ष इन्द्रमान तुलाधर र चाइना ट्रेड लिंक प्रालिका प्रबन्ध निर्देशक राजन महर्जनले हस्ताक्षर गरेका छन् । क्लब र चाइना ट्रेड लिंक प्रालिबीच एक वर्षको सम्झौता भएको हो ।
सम्झौताअनुसार चाइना ट्रेड लिंक प्रालिले क्लबलाई करिब ७ लाख बराबरको खेल सामग्री दिनेछ ।
यस्तै एक वर्षको सम्झौताअनुसार खेलाडीलाई निल डेभिडले हेयर कटलगायत सुविधा दिइनेछ ।
क्लबले यो सिजनको लागि २ करोड ४० लाख रुपैयाँ खर्च गर्न लागेको छ ।
संकटालाई यस पटकको लिगका लागि महानगरपालिकाले १० लाख रुपैयाँ सहयोग गरेको छ । अन्य प्रायोजन पनि खोजिरहेको अध्यक्ष तुलाधरले बताए ।
शुक्रबार सुरु भएको लिगमा संकटा चौथोपटक लिग च्याम्पियन बन्ने लक्ष्यमा छ । क्लबले आइतबार त्रिभुवन आर्मी फुटबल क्लबसँग खेल्नेछ ।
