विराटनगर –मोरङको सुन्दरहरैँचामा लामो समयदेखि बन्द रहेको विराट चोकको सुकुना चलचित्र मन्दिर पुनःसञ्चालनमा आएको छ । विराट सिने नामबाट हल सञ्चालनमा आएको हो ।
हलमा नेपाली फिल्म छक्का ‘पञ्जा ४’ शुक्रबारदेखि प्रदर्शन भएको सञ्चालक तथा फिल्म निर्माता चीरञ्जीवी बस्नेतले जानकारी दिए । उनले सिनेमा हल व्यवसायका लागि मात्र नभएर कलाकारको सम्मान तथा कला संस्कृतिको जगेर्ना गर्ने भएकाले हल सञ्चालनका लागि स्थानीयको साथ सहयोग हुन जरूरी छ भने ।
३ जना लगानीकर्ताको ४ करोड रुपैयाँभन्दा बढी लगानीमा सुविधा सम्पन्न हल सञ्चालनमा आएको उनले बताए । हलमा १३० सिट क्षमता छ । हल विगत २ दशकअघि स्थानीय गणेश खड्का, ईश्वरी विष्ट,केशव विष्ट लगायतले सञ्चालन गरेको थियो ।
सञ्चालक बस्नेतले भने, ‘अहिले एउटा पर्दा सञ्चालनमा आएको छ । अब केही समयपछि दोस्रो पर्दा सञ्चालनमा आउने छ ।’ सुन्दरहरैँचा नगरपालिका क्षेत्रमा एउटा सिनेमा हलको खाँचो भएकाले यस अभावलाइ विराट सिनेले पूरा गर्ने वडा –९ का वडाध्यक्ष प्रकाश श्रेष्ठले बताए ।
